۴۴ - میرزه علی معجز شبسترلی "گلین"
گلین
دچار فقر و ضرورت اگر اولا استاد
هزار سال اوخوسا، اوغلون آنلاماز بیرزاد.
معلم اولسا پریشان روزگار ای دوست
چوره ک خیالی ائدر ذهن ائوین اونون برباد.
گلر چیخاندا ائویندن دورار قاباغیندا
نه اَت، نه قند، نه سوغان وار نه دوز دییه ر آرواد.
او حال ایله یئتیشر مکتبه عبوس و غضوب
دوگر اوشاقلاری بی جرم یوکسه لر فریاد.
ز بسکه پرت ائدیب او بینوانی پولسوزلوق
جیبینی، قولتوغونو آختارار الینده مداد.
معلمه وئریله یاخشی ماهیانه گرک
گرک معلم اولا احتیاجدان آزاد.
آچین قولاغینیزی ای دوستان من ائشیدین
وطن خرابه لری علمیله اولار آباد.
بیز ایسته ریک فلکی سیر ائده ک اولاغ ایله
ائشک گویه اوچا بیلمز چون اوندا یوخدو قاناد.
گلین یئنه ک آشاغی مرکب جهالتدن
فرنگیلر کیمی طیاره ائیلیه ک ایجاد.
کیمین الینده دیر ایندی مدینه و مکه
او پاک یئرلریمیز کربلا، نجف، بغداد.
سه سین چیخارتما آماندی که باشین اوسته دوروب
الینده تیغ دو سر انگلیس بد بنیاد.
حسین دشمنی ایله ائتدی جنگ مردانه
توپ اوینورسان هله سن ایندی طفل تک ای داد.
ایشیقلانار گئجه گوندوز چراغ حریت
محالدیر قاییدا بیر ده دور استبداد.
گلین دیز اوسته قویاق بؤرکو بیر گؤزه ل دوشونه ک
بو گون گرک بیز اولاق صید خلقه یا صیاد؟
گلین گئده ک اوخویاق بیزده اهل غرب کیمی
که بلکه ال چکه بیزدن او بی امان جلاد.
گلین دوتاق بو معلملرین باشین قیزیلا
اولار دا علمیله جمله جهانی ائیلسین ارشاد.
گلین کماندان ائده ک طرد تیر تکفیری
قولاق وئره ک معجزه بیز هر چه بادا باد.
میرزه علی معجز شبسترلی