۴۳ - سورغونامه
سورغونامه
بو دونیا ذیللتدن باشقا ندیر کی
عذاب منزیلیدیر یاراندیغیندان.
آللاه بو دونیانی یاراتدیغی چون
هله ده گیزله نیر اوتاندیغیندان.
سوننوییک، شیعه ییک، آتئیست لریک،
زرتشتوک، کاتولیک یا دئیست لریک.
بوتلری سیندیران داهی لری ده،
بوتلره چئویرن بوتپرستلریک.
آللاهدان ایذینسیز یارپاقدا دوشمه ز
مئیوه ده دوشمه ز، دئییر موللالار.
شئیطانین ایذنیله دوشوبدو یقین
مسجیدین اوستونه دوشه ن بومبالار...
مسجیدلر آللاهین ائویدیر بالا
داها بؤیوموشم کئچ بونلاری کئچ...
مسجیدلر آللاهین ائوی اولسایدی
یئتیم لر کوچه ده یاتارمیدی هئچ؟
توپوروب آلتی مین بئش یوز ماناتا،
شئیطانا داش آتماق عشقینه بیر باخ.
گؤره سن دوشونور داش آتا-آتا،
شئیطانی میلیونر ائله ییر بدباخت.
داشا پول اؤده ییب چؤله آتیرلار،
هئچ بونو شئیطاندا سرگیله مه زدی.
شئیطانا آتیلان داشلار ییغیلسا،
بیر یئتیم کوچه ده مورگوله مه زدی.
اینسانلیق حیسسیمیز، دویغوموز واردیر،
هر کسین تانرییا وار احتیاجی.
بیر شرطله تانرینی کیتابلاشدیریب،
اؤنومه قانونلار قویما آی حاجی.
او دونیا دئییلن ایکینجی شانس یوخ،
وار ایسه شکلینی چک منه گؤسته ر.
گؤر اینسان نه قدر اگوئیست دیر کی
اؤلندن سونرا دا یاشاماق ایسته ر!
عربین ساققالی گده لرینه،
گؤر نئچه عصیردیر آغلاییریق بیز.
وطن چون جانینی وئره ن شهیده،
بیر ایل یاس ساخلایا بیلمیر اؤلکه میز.
دوغولسایدین واشنگتوندا، رومادا،
بؤیوسه یدین پاریسده، لوندوندا سن.
اؤلکه نین دینینی کنارا آتیب،
دؤنوب شیعه اولارمیدین گؤره سن.
ائوینه بیر چؤره ک آپاراممیرسان،
ایللردیر مسجیدده باشینی یاردین.
باشینا دؤیدویون قدر بلکه ده،
تاختایا دؤیسه یدین تویلار توتاردین.
پئنسییا آلمایان بابا سئویلمه ز،
قالخیب اوتوروسان زحمت اولماسا.
اینانج دا، ایمان دا، قارشیلیقلیدیر،
آللاهی کیم سئوه ر جننت اولماسا؟
کئچیریب بومبانی اؤز کوره یینه،
جننته دوشه جک سانیر هارداسا...
نه تئرور اولاردی، نه آجی اؤلوم،
جهننم اولماسا، جننت اولماسا.
سنه دار گونونده ال توتان دوستون،
باشینا قاخارسا گلرمی خوشا؟
"سنی من یاراتدیم اییل اؤنومده،
یوخسا یاندیرارام!" دوشمه دیم باشا...
-دیز چؤکدوم-چؤکمه دیم سنین اؤنونده،
ایلاهی سنینچون ندیر دییشه ن؟
آللاهدا اینسانین آغیلیندادیر؟
آد قویا بیلمیره م بو سارساق ایشه.
اینسانی ایمتاحان ائله ییر آللاه،
بو ایشده نه منطیق، نه ده اساس وار.
آللاه اؤز قولونا اعتیبار ائتمیر،
قول نییه آللاها ائتسین اعتیبار؟
لعنت اوخویورسان کافیره، آخماق،
دوعالر ائدیرسن من اولماییم ساغ.
مین ایللیک پلانین، نیظامین آللاه
سنین قارغیشین چون دوشوب پوزاجاق؟
اولیم طبیعت، سونوم طببعت،
اومودوم قالماییب داها آللاها.
شئیطانا قوماردا اودوزوب آللاه،
جننته وارلیلار دوشه جک داها.
جننته دوشه نلر راحتلیق تاپار،
بیر سوال ایچیمده دردده، قمده دیر.
جننتده بیز نئجه راحات اولاریق
بیلسه ک کی آتامیز جهننمده دیر؟
بازاردا آللاها آند ایچمه دینسه،
همین گون بوغازا قدر باتیرسان.
دئمه لی ساتیلان ماللاردان اول،
ویترینه آللاهی قویوب ساتیرسان.
ترسینه اوخوساق زامان سؤزونو،
چوخ آچیق گؤسترر ناماز اؤزونو.
شیفره لر موقددس ساییلیر دئمه ک،
که له مه محبت بسله یه ک گرک.
آللاهی جننته گؤره سئونله ر،
علاوه سون گوندور نه اوچون سوندان.
جننتده یئر یوخدور سؤیله سه آللاه،
شیکایت ائدرلر پولیسه اوندان.
وحشییه حیسسییات، احتراص وئردین،
باخ قیزی زورلاییر-دورموسان نییه؟
سن آرتیق او قیزین گؤزونده هئچسن،
جننتی وئرسنده زورلانیب دئیه.
نه قدر گؤزه للیک وارسا دونیادا،
آللاهین آدینا یازیلمیش نه دن.
نه چیرکین مؤوضولار وارسا سؤیله ریک،
ایبلیسدیر، شئیطاندیر اونو تؤره دن.
بس چیرکین عملین کؤکو هاردادیر،
یارادیب شئیطانی، ایبلیسی آللاه.
شیطاندا، ایبلیسده گوناهکاردیرسا،
گوناهین، نوقصانین بانیسی آللاه.
بیز جاهیل آداما چوبان دئمیشیک،
چوبانلار ایداره ائده ر قویونو.
محمد یوکسه لیب چوبان اولوبسا،
موطلق کی اوجالدیب قویونلار اونو.
دونیانی آیاقدا ساخلایان سؤزدور،
هر شئیدن آرتیقدیر قیمتی سؤزون.
محمد قورآنی ائله یازیب کی،
اولمایان آللاهدا وار سانیب اؤزون.
بیر کیتاب اللی ایل نامازا ده یر،
دیلیمده شوعاردیر نه قدر ساغام.
آللاهین آتاسی اولسایدی اگر،
دییردی بالامی اوخوداجاغام.
اینساندان آسیلی یاشاییر آللاه،
اینساندیر سؤیله ین شئیطان وار، نوح وار.
بوس-بوتون محو اولسا بوتون اینسانلار،
کیم دییر آللاه وار، کیم دییر روح وار؟
دئه گؤروم نه وئریب جاهانا ایسلام،
تحصیله، منطیقه یوخدور هوسی.
علمین کشفلرینی ایسلامدان آلساق،
قالاجاق ساققالی بیرده ده وه سی.
آزادلیق بیزلره اوزاقدیر هله،
اتیمیز سیاست تونقالیندادیر.
تورپاغی ایشغالدان قورتارساق بئله،
بئینیمیز عربین ایشغالیندادیر.
ابراهیم خدایی