۲۲ - گلين بو وحشیليگه سون قوياليًم!
گلين بو وحشیليگه سون قوياليًم!
کور قورور حاقلی سوزه قارشی چيًخار،
کور قورورون ائوينی منطيق ييًخار.
گلين بو وحشیليگه سون قوياليًم،
ناز اکيب، ناز بيچيب، يئييب دوياليًم.
دوغولاندا اينجيتميشم آنامی،
کی اينجيتمه يم باشقا بير آدامی.
دونيا فانی دئييل، عومور فانيدير،
اينجیيه بيلن جانلی نيًن جانيًديًر.
اينجيتمک وحشی حئيوانين ايشیدیر،
اينجيدن انسان دا بير نوو وحشیدیر.
اينجيتمه گين کيمسه يه خئيری يوخدور،
هم ده اينجيدنه ضرری چوخدور:
اينجيدن اينسانی ويجدان اينجيدر،
بير کز سينسيدنی مين کز سينسيدر.
دوست اينجيتمه مه ليدر اوز دوستونو،
يوخسا آچماليًديًر گيزيًن اوستونو.
دوستلوق قوردوران اورتاق کاراکئتردیر،
اورتاق کاراکتئر ساغالدان دوکتوردور،
دييشيک اوزه لليکلر هر کسده وار،
ياخشی ايله پيسی "آختاران تاپار".
هر بير ويجدان اوچون ياخشی ياخشیًدیًر،
ويجدانيًنی دينله مه ين وحشیًدیر.
پيسی ياخشيًدان آييًران ويجداندیًر،
ياخشيًيا پيس دئين خسته انساندیًر.
خسته ليگين سببی سومورودور،
محصولو اوزو قارا کومورودور.
ويجدان حوققا-فيًريًلداقدان آنلاماز،
اويره نمه دن خوروز تکين بانلاماز.
فيًريًلداقچيًلاری تانيًمتاق اوچون،
گرکن علملر کشف اولوب بوگون.
علم قويماز تابو* ائده آناسی،
دئيه "کوره گی ائنلیدی" بالاسی.
*- ماحميًد علی بی چهرگانلی نيًن آناسی نيًن دئديگينه گوره،
گويا بالاسی چهرگانلی ليدر اولماق اوچون دوغولوبدور.
چونکو "کوره گی ائنليدير".
ميللی حرکتيميزين اوگونکو دورومو ايله شوعور
سئوييه سینی بوگونکو سئوييه سی ايله توتوشدورون!
"تابو"لاری بالتاجی آراز ييًخدی، <<<
تابولاشديًران امک بوشا چيًخدی. <<<
علمين کشف ائتديگی دئموکراسيًديًر،
دئموکراسيًيا اويمايان عاصيدير.
دئموکراسی دئير آييله قورون، (... سيياسی قوروم)
وئرديگينيز سوزون اوستونده دورون.
دئموکراسی دئير هر بير دوروما،
عئينی حاقلاری وئر هر بير قوروما.
دئموکراسی دئير هربير قوروما،
عئينی حاقلاری وئر هر بير بيريمه. (بيرئيه)
دئموکراسی دئير حاق وئر دانيًشا،
دوشونجه اوره تمک اوچون ياريًشا.
دئموکراسی دئير سربستجه دوشون،
دوشونورون اوستونه چکمه قوشون.
دئموکراسی دئير قوی سوزون دئسين،
يئرسيز تحقير ائدن کوته گين يئسين.
دئموکراسی دئير دينلمک اويره ن،
دينله يه بيلمه سن اوزوندن ايره ن.
دئموکراسی دئير سور ندنینی،
کی اويره نه، تانيًيا مدنی نی.*
*- سورمادان،بيلمه دن، اويره نمه دن، اويره تمه دن
يارقيًلاماق اولماز.
دئموکراسی دئير اونجه تنقيد ائت،
جاوابسيًز بوراخسا اوز يولونو گئت.
دئموکراسی دئير باش ای ارنه،
آزيًنليًغا عئينی حاققی وئرنه.
دئموکراسی دئير آلچاغی آلچالت،
بويوکو بويوکلوگو قدر اوجالت.
دئموکراسی دئير قورور ياخشيًدیًر،
او زامان کی، حاققيًن سنگرداشيًدیًر.
قورور ناموسو قورويان قوچاقديًر،
منليگی ساغلام اولمايان آلچاقديًر.
قورورلو ويجدان باش اير بويوکه،
قويماز آلچاق فارس أششک دئيه تورکه.
قورور ايستر کی، اوزونو به يه نه،
ويجدان حاق وئرر پيسه پيس دئيه نه.
قورور بيلمه دن جهلینی به يه نر،
هم ده جاهيل قالماق اوچون ديره نر.
قورور آنلاماز پيس ايله ياخشيًنی،
دييشديرمز کيمسه نين باخيًشيًنی.
قورور بصيرت گوزونو کور ائدر،
سوز ائشيدن قولاغيًنی کار ائدر.
قورور دئير توتدوغونو بوراخما،
حاقلی اولوب اولماديًغيًنا باخما.
قورور قويماز کی، جاهيل آغيًللانا،
پاسلانميًش آغلی-بئينی سيًغاللانا.
قورور قويماز اوزوندن تنقيد ائده،
ياخود تنقيدچی نين يولونو گئده.
قورور بيرلشديرن باغلاری قيًرار،
هم ده رقيبی نين آغزيًنا وورار.
قورور لازيًمدی کی، ياخشی قورونا،
قويماييًن صرف اولا يئللی بورونا.
قورور لازيًمدی کی، حاققی قورويا،
يوخسا ايسترم کوکوندن قورويا.
قورور دئير سوچومو ايچ ائيله مه،
ايچيندن پيسليک چيًخارما قلمه.
قورور دئير رذيل ائتمه يين منی،
بوراخيًن اينجيديم تنقيد ائدنی.
قورور دئير منی عئييبسيز سانيًن،
خطريمه ديمه مک اوچون ده يانيًن.
قورور ايستر کی، اوز عملی ايله،
اوزونه تای اينسان ائده تربييه،
داغيًلسا دا قوراجاغی ... آييله. (قوروم)
قورور دئير سورما مندن سببی،
جاوابسيًز رعايت ائتمز ... ادبی.
قورور بيليکسيز- منطيقسيزوارليًقديًر،
موقلليد تکين اويونجاق يارليًقديًر.
قورور باش ايمز حاقق ايله منطيقه،
دوغردور، دييشمز هئچ بير عنتيقه.
قورور دئير سئومه سن گل ساواشاق،
يوخسا سوچوما تنقيدسيز ياناشاق.
قورور ايستر قورور اوستونه جوما،
ايسته مه سه کی، سوچونا گوز يوما.
قورور دئير منه تحقيرحاققی وئر،
منه قارشی تحقيره وئرمه يين يئر.
قورور قوندارما گوزلوک ده تاخديًرار،
ليدر اولا بيلمه سه قان آخديًرار.
قورور باريًشديًرماز کی، قاريًشديًرار،
چهرگانلی بی تکين ياريًشديًرار.
ويجدان اويادارکی، جاهيل قالمايا،
قورور قالديًران دآوآيا ... دالمايا.
قورور وار کی، ييًخار ائوی، ائشیگی،
قورور وار کی، ائدر ... وطن کئشيگی.
جهلدن يانا قورور ييًخيًجيًديًر،
کور قورورلا ياشاماق سيًخیًجيًديًر.
کور قورور حاقلی سوزه قارشی چيًخار،
کور قورورون ائوينی منطيق ييًخار.
19.05.2010 بالتاجی آراز