21 آذر 1324آذربایجان ملی حکومتی

تهران، ائشيتدي ييميزه گؤره، ايالت  و  ولايت انجمنلري نين انتخاباتيني باشلاماغا تشبث ائدير. بو چوْخ  گئج دير. آرتيق انجمن بيزي تأمين ائده بيلمز. بو دالدان آتيلان داش كيمي دير كي، فقط توْپوغا  ده ير و هئچ   بير تاثير باغيشلاماز.

                               سيد جعفر پيشه وري

اولي و قديم ملّتيميزين ملي - آزادليق و دئموْكراتيك حركاتي، اوزون مبارزه يوْلي كئچميش، بير چوْخ آغير و دؤزولمز اوْلايلاري آرخادا  قوْيموش، نهايت 1324- جي ايلين 21 آذرينده ملي حكومتين يارانماسي ايله  اؤزونون  ان اوجا ذيروه سينه  يوكسلميشدير.

اؤلكه ده اجتماعي حياتين بوتون ساحه لرينه دريندن تأثير ائدن بو علامت دار حادثه گؤركملي اجتماعي- سياسي خاديم سيد جعفر پيشه وري نين:‌" آذربايجان ملي حكومتي بير حقيقت دير؛ اوْني داها گئري قايتارماق اوْلماز!"- كلامي ايله يادداشيميزا حك اوْلموشدور.

"عصرلربویی یورولمادان اؤز آزادلیغی واستقلالیتی یولوندا قهرمانلیق لا مبارزه ائدن بؤیوک خالقیمیز نهایت، اؤز تاریخی آرزوسونا، اؤز مختاریّتینه نائل اولموشدور.آذربایجان خالقی نین ابدی فخر منبعلری اولان آتروپاتین، بابکین، جاوانشیرین، شاه اسماعیلین قهرمانلیلیق لاریندان ایلهام آلان بؤیوک خالقیمیز بوگون اؤزمقدارتینی حل ائتمه یه  قادر اولموشدور{1}.

سیدجعفر پیشه وری یازیر کی: بیز بیلیردیک کی ، الیمیزده دولت تشکیلاتی، سیاسی قدرت و اختیار اولمازسا فارس متعصبلری بیزه مدنی مختاریت وئرمه یه جکلر. مدنی مختاریت عباره سی محدود اولدوغی اوچون داخیلی آزادلیق و اؤز مقدارتینی اؤزی تعیین ائتسین سؤزی ایله مختاریت سؤزونی عوض ائتدیک {2}.

"21 آذر" حركاتي نين ذيروه سي ، آذربايجان ملي حكومتي، تكجه محدود محلی  و ملي ماهيّتده اوْلماميشدير. آذربايجان ملي حكومتي اؤزونون ماهيّتي اعتباري ايله ملي- آزادليق و دئموْكراتيك كاراكتر داشيميشدير.

 حركاتين رهبري سيد جعفر پيشه وري  يازيردي كي، بئش آي بوندان اوّل تهران مرتجع مطبوعاتي نين و فارس متعصبلري نين ايجاد ائتديكلري اوهام و خرافات بولودلاري آراسيندا آذربايجانلي اوچون  بو ساده ليكله ملّت و يا دولت ادعاسينا دوشمك، آسان ايشلردن دئييل ايدي. ايندي آرتيق ملّيّتيميزي ثبوت ائديب، دولتيميزي ملي اساسلار اوزرينده  قورموشوق. گئت- گئده خالقيميز و خارجي لر بو آدلاري ائشيتمه يه عادت ائتميشدير. آرتيق آذربايجان ملي دولتي بير حقيقت دير.

سيدجعفر پيشه وري  علاوه  ائديردي كي ،  مجلس شورا  و مطبوعاتدا عليهيميزه ايشله ديلن  ناروا  سؤزلر بيزه آرتيق درجه ده كؤمك ائتدي. بو واسطه ايله  خالقيميز آنلادي كي ،  بو آسانليقلا  اوْنا آزادليق و مختاريت  وئريلمه يه جكدير.اوْنا گؤره اؤزي اؤز باشينا چاره آختاريب ملي  دولتي  وجودا  گه تيردي{3}.

ملی اوندر یازیرکی، دنیادا اولان بوتون ملتلرین تصویب و تصدیق ائتدیکلری  اصوللاردان بیریسی ده  ملّیت آزادلیغی پرنسپی دیر. مثلا ، بین الملل حقوق مجموعه لرینده درج اولوب، دنیانین ان عظمتلی دئموکرات دولتلری طرفیندن تأیید ائدیلمیش آتلانتیک منشوروندا دئییلر: هر خالقین مقدراتی، اؤز طرفیندن تعیین ائدیلمه لی دیر. ملیت آزادلیغی  و هر خالقین اؤز مقدراتینی تعیین ائتمه ایشینده آزاد  و مختار اولماسی نه کیمی تفرعات  و اصوللاردان تشکیل تاپیر؟- دیل آزادلیغی ، ملی مدنیت آزادلیغی و سایر اقتصادی، سیاسی، اجتماعی آزادلیقلار بو مسئله نین اساس پرنسیپلریدیر. بو ايسه البته كافي دئييلدير. گره ك حكومت محكم قانون اوزه رينده  اساسلانسين{4}.

آذربايجان ملي حكومتي او جهتدنديركي،مليّت،جنسيت،دين و دوشونجه مسئله لريندن آسيلي اوْلماياراق،آذربايجاندا ياشايان گئنيش خالق كوتله لرينين منافعيني نظرده توتوردی. جمعيّتين انكشاف قانونونا اويغون، اوْنون اراده سيندن دوْغان و اوْنون منافعيني اؤزونده عكس ائتديرن ملي حكومت اؤز پروْقرامينا اساسا چوْخ ملتلي دولت اراضيسي داخيلينده تعيين مقدرات حقوقونااساسلاناراق،ملتيميزين خصوصيتلرينه تطبيق اوْلان دئموْكراتيك ماهيّتي  گونده مه  گه يتيرميشدير.

آذربايجان ملي حكومتي خالقين اراده سي نين نتيجه سي كيمي اوْرتايا چيخديغيندان اوْنون حركت وئريجي قوّه سي ده خالقين گئنيش طبقه و قشرلري اوْلموشدور. يئني يارانميش آذربايجان ملي حكومتي فوْرمجا ملي اوْلدوغی حالدا، مضمونجا دئموْكراتيك حكومت ايدي.

سیدجعفر پیشه وری یئنی یارانمیش دولت ده نقصانلارادا اشاره ائدیب یازمیشدی: دولت الیمیزه کئچدیکدن سونرا یئرلرده چوخ اشتباهلار اولموش، بعضاً فرقه تشکیلاتی حکومت اداره سی نین ایشینی منیمسه میشدیر. بونون ایسه ایشه آرتیق درجه زیانی اولا  بیلر. بونون تئزلیکله  قاباغی آلینمالی دیر. بعضی یئرلرده  فدائی لر فرقه و حکومت ایشلرینه قاریشیب اؤز باشلارینا ایشلر گؤرورلر. بونا ایسه جداً  آخر قویولمالی دیر. فرقه گره ک خالقی انتظاما و قانونی رعایت ائتمه یه عادت وئرسین . امنیت و قانون اولمایان بیر اؤلکه ده آزادلیق اولا  بیلمز. بیز گره ک خالقی قانون مقابلینده مساوی  توتماقلا  حقیقی قارداشلیق، دوغری برابرلیک  وجودا  گه تیره ک. شخصی امتیاز، شخصی بوینی یوغونلوق ایله جدی و آمانسیز مبارزه آپاریلمالیدیر. فرقه ایشلری ایله دولت ایشلری گره ک بیر- بیریندن آیریلسین{5}.

بو جهتدنديركي، آذربايجان ملي حكومتي عموم خالقا، ملي و مترقي قوّه لره آرخالانميشدي.

" فرمان" قزئته سی مسئول مدیری نین تبریزده کی، ایران دیویزیاسی کوماندانی ژنرال درخشانی ایله اولان صحبتین متنینی تهرانین" رهبر" قزئته سی درج ائتمیشدیر. درخشانی نین مسئول مدیره  بیلدیردی یینه  گؤره ، دیویزیانین افسرلری اؤز مشاوره لرینده بیر سسله ایران آذربایجانی حکومتینه تابع اولماغی سؤیله میشلر.درخشانی، آذربایجاندا کی دئموکراتیک حرکاتا گویا اهالی طرفیندن کؤمک ائدیلمه دی یی حاقیندا مرتجع عنصرلرین  تهراندا  یایدیقلاری خبری قطعی صورتده  تکذیب ائتمیشدیر. درخشانی  بیلدیرمشیدیرکی، دئموکرات فرقه سی نین عضولری ایچه ریسینده جامعه نین مختلف طبقه لریندن نماینده لر واردیر{6}.

" انقلابي و دئموْكراتيك مضمونا مالك اوْلان ملي حكومتين قانونلاري ملي دئموْكراتيك قورولوش شرايطينده  بوتون زحمتكش خالقين اراده سيني ايفاده ائدير و اوْنون منافعيني قوْرويوردی. آذربايجان ملي دئموْكراتيك حكومتي نين قانونونا بئله تعريف وئرمك اوْلار: بو قانونلار عالي حاكميت اوْرقاني اوْلان ملي مجلسين آكتي اوْلاراق يوكسك حقوقي قوّه يه مالك اوْلوب بلاواسطه آذربايجان خالقي نين اراده سيني ايفاده ائتميشدير.بو جهتدن آذربايجان ملي حكومتي نين قانونلاري ايران دولتينين قرار و قانونلاريندان كؤكلي شكيلده  فرقله نيردي"{7}.

اهالي نين حيات صحنه سينده لازيم اوْلان بوتون ساحه لرينه ملي حكومتين تأثيري نه اينكي تكجه ايران داخيلينده ياشايانلارين، بلكه ياخين  و اوْرتا شرق اؤلكه لري داخيلينده  ده  مثبت روْل اوْيناميشدي.

ملي حكومتين يارانماسي نتيجه سينده آذربايجان خالقي سياسي حاكميت الده ائتمكله دئموْكراتيك اساسلار اوزره ملي حاكميت اوْرقانلاري ياراتماق، استقلالا مالك قضائي اوْرقانلاري وجودا  گه تيرمك، اجرائي قوّه، قانون وئريجيليك قوّه سي و قضائي اوْرقانلار آراسيندا هم آهنگليك ياراتماق، يئرلي حاكميت مسئوليتيني يئرينه يئتيرمك اوچون كند، شهر و ولايت انجمنلري تشكيل ائتمك، سؤز و ييغينجاق آزادليغي، عقيده  و وجدان آزادليغي ، اعتصاب  و نمايش  آزادليغي ، اجتماعي  و فردي آزادليغي تأمين ائدن مسئله لر ملي حكومت دؤورونده اؤز حليني تاپميشدير.

سیدجعفر پیشه وری یازیردی کی،  تهران یازیچیلاری ناحق باشیمیزی آغریتماسینلار. بیزده  بیر قدرتلی دولته طرفداریق؛ بیزده هر بیر جمعیت و هر بیر کسدن آرتیق ایراندا امن- آمانلیق طرفدارلارینین ایش باشینا گئچمه لرینه طالیبیک. بیزده  وار قوّه میزله اؤلکه میزین قانونی دئموکرات بیر اؤلکه- اولدوغونی آرزو ائدیر و بو یولدا مال و جانیمیز ایله چالیشیریق. بونونلا  بئله تهرانین سیاستمدارلارینین خائن و نالایق اولدوقلارینی هرگز اونودا بیلمه ریک . بیز انکار ائتمیریک ، تهراندا آزادیخواه و شریف آداملار تاپیلا بیلر.لاکین، اونلارین بو گونکی سیاست بازارینا یوللاری یوخدور. اورا ایندی جاهل، متعصب  و ساتیلمیش هووچیلارین  بارماغی ایله رقص ائدیر.

مقاله نین آردیندا ملی اؤندرعلاوه ائدیرکی، تهرانین باشچیلاری  ولایت اهالیسی اوچون حاق - حیات قائل دئییللر. اونلار اؤزلرینی اشرف مخلوقات حساب ائدیر؛اونلار اؤز نظرلرینده فیلین بورنوندان دوشموش بؤیوک آداملاردان عبارتدیرلر. بو سفیل جاهیللر آنلامیرلارکی، ولایت لری  برباد ائدیب، مملکتین اهالیسی کور، جاهل و اسیر حالیندا قالماغا محکوم اولورسا، اونلارین قدرتی اللرینده قالا بیلمز. بو صورتده اؤزگه لر اونلارین باشلارینا ووروب چؤره کلرینی اللریندن آلار. قارینلاری نین پیی ده چوخ تئزلیکله ارییب گئدر.چاره ایسه لجاجت آتیندان دوشوب خالقا آزادلیق وئرمک، ایالت و ولایت انجمنلرینی دعوت ائدیب جماعتین اختیارینی اؤز الینه تاپشیرماق و بوتون ایران ایالتلرینده یاشان شریف و پاک عنصرلرین کؤمه یی ایله مملکتی ترقی یه  دوغری آپارماقدان عبارتدیر. کورمستبدلر بوندان باشقا  هر بیر کوزه یه ال آتمیش اولسالار قورپی اللرینده  قالا جاقدیر{8}.

سيد جعفر پيشه وري بيرينجي كندلي كنفرانسيندا ایسه دئييردي:- بيز دئييريك كي حكومت باشيندا گره ك آذربايجانلي اوْلسون. فقط خالقين اؤز ايچه ريسيندن چيخميش آدام خالقين ايسته ييني بيلر. ايندييه  قدر ايران و آذربايجان تاريخينده گؤرونمه ييب كي، خالق اؤز ايسته دي يي كيمي حكومتيني قورسون. دوزدوركي، دفعه لرله آذربايجان خالقي علم گؤتوروب آزادليغيني آليب .لاكين، ملي حكومت قورولماغا  قدر اوْندان استفاده ائده  بيلمه ميشدي. ملي حكومت ايسه عملده  بو ايشي گؤرمه يه موفق اوْلدوغوني اثبات ائتدي{9}.

"آذربایجان" روزنامه سی" هامی یا، هامی یا، هامی یا " باشلیقلی سیدجعفر پیشه وری نین مراجعتینی چاپ ائتمیشدی . ملی اؤندر بو مراجعت ده یازیردی: تاریخین عهده میزه محول ائتدی یی شرفلی و افتخارلی وظیفه لریمیزی بو گونه دک باش اوجالیغی ایله انجام وئریب نفوذلی فرقه ، ملی حکومت، بیر سؤزله ملی دولتیمیزی یاراتماق آرزوسونا نائل اولموشوق. بو یولدا بوتون خالق آیاغا قالخیب وار قوّه سی ایله چالیشمیشدیر. آذربایجاندا  بیر شهر، بیر کند، بیر محله ، بیر ائو، بیر اوبا  تاپیلماز کی، اونون افرادی بو قانونی حقی آلماق یولوندا فداکارلیق گؤسترمه میش اولسون. خالقیمیزین دوشمنلری بئله ، اونون وجودا  گه تیردی یی  بؤیوک  نهضتی انکار ائتمکدن عاجزدیرلر.

 مینلرجه کیشی، آرواد، جاوان و قوجالاریمیز مجلس ملی انتخاباتیندا گؤستردیکلری علاقه  و ابراز ائتدیکلری احساسات ملی آزادلیغیمیزین پایه و اساسینی تشکیل ائتمیشدیر. ایندی آرتیق آذربایجان ملی دولتی ائله بیر حقیقت دیرکی، اونون دوام و بقاسی بوتون دنیانین عدالت پرور و حقیقی دئموکرات عنصرلرینین آرزولاریندان ان مهمینی تشکیل ائدیر.  بو یولدا خالقیمیز بؤیوک استعداد و قابلیت گؤسترمیشدیر.

سیدجعفر پیشه وری علاوه  ائدیر کی ، خالقیمیز ایستر فرقه میزین سیراسینا داخیل اولماق، ایسترسه ملی دولتیمیزین قرارلارینی اجراء ائتمک،ایسترایسه ملی مجلسیمیزین قانونلارینی آلقیشلاماق ایله اؤزو نون اتحاد و بیرلی یینی ثبوت ائتمیشدیر{10}.

ملي حكومت آذربايجاندا دولت حاكميّتي نين  ماهيّتيني  ده ييشدي يي كيمي، اوْنون اداره سيستمينده ده تحول عمله  گه تيرميشدي. ارتجاعچي ايران رژيمينين آذربايجاندا  كي، فئودال- بروْكرات دولت دستگاهيني سينديراراق اوْنون يئرينده ملي- دئموْكراتيك حكومتين يئني دولت قورولوشونی اوْرتايا  قوْيدی.

"21 آذر نهضتی سؤزون اصل معناسیندا گئنیش خالق حرکاتی ایدی. بو حرکاتدا دئمک اولارکی، کندلی و کارگر کوتله لرینین اشتراکی ایله یاناشی جمعیّتین بوتون طبقه لری نین نماینده لری ده اشتراک ائتمیشلر. بو حرکاتین قوربانی اولموش آداملارین حیاتی دا بو مدعانی تصدیق ائتمکده دیر. بو چوخ کاراکتریک دیرکی، شهیدلرعائیله سینده  بیرله شن آداملار سیراسیندا دا مختلف زمره و طبقه یه، پئشه و صنعته مالک اولان آداملارا راست گلمک اولور. شهیدلر سیراسیندا علی عبادی ، امن خان بخشی به یی ، حسن صبرعلی اوغلی ، رحیم  صمد اوغلی کیمی کارگر، غلامعلی اسماعیل زاده، محمد حسن رزاقی، میرزا آقا توحیدی، سعیدخان، حیدرخان آفاقی کیمی کندلی نماینده لر، محمدرضا خادمی، حسین تراشی، میرزا کیشی مجردی ، اکبر بناب تک صنعتکارلار، عباس فتحی، محرم انشائی ، بهرام نابی، سعدی یوزبندی کیمی ضیالی نماینده لر، حسین غفاری ، عطاالله زندیان، قربانعلی آریانتاش ، علی سغائی ، عظیم بلندی کیمی حربی ایشچی نماینده لر، ها بئله اینجه صنعت ایشچیلری، کسبه، دکانچی و سایره واردیر. شهیدلرین جغرافی احاطه دایره سی ده چوخ گئنیشدیر. بورایا دوغما وطنیمیزین تکجه تبریز، اردبیل ، اورمی، خوی، ساراب، مشگین شهر و آذربایجانین کند ماحاللاریندان اولان قهرمانلار دئییل، همچنین ایرانین دیگر شهرلریندن اولان وطنپرستلرده داخیلدیر"{11}.

سید جعفر پیشه وری قید ائتمیشدیر کی، دئموکراتلیق ان مترقی و عالی بیر فیکیر دیر. بیز اونی تام معناسی ایله  حیاتا  کئچیرمه یه  چالیشمالی ییق. بیز وار قوّه میزایله چالیشاجاییق کی ، ملت افرادی نین هامیسی دولت ایشلرینه مداخله ائده  بیلسین  و هر بیر فردین اراده سی مملکتین مقدراتیندا مؤثر اولسون{12}.

" آذربايجان ملي حكومتي تشكيل اوْلدوغی بيرينجي گوندن خالقا آرخا لاناراق اؤزونون وزيرليكلري واسطه سي ايله دئموْكراتيك تدبيرلرين حياتا كئچيريلمه سينه باشلايير.عالي اجرا ائديجي اوْرقان اوْلان ملي حكومت اؤز فعاليتيني بلاواسطه خالقين احتياج و طلباتيني تأمين ائتمه يه  يؤنلتميشدير.ملي حكومتين برنامه سينين اساسيني آذربايجان خالقي نين ايللر بوْيی مبارزه لردن سوْنرا الده ائتدي يي ملي مختاريتي نين عملده حياتا كئچيريلمه سي، خالقين مادي و معنوي احتياجلارينين تأمين اوْلونماسي، اوْنی ترقي و تكامله چاتديرماق تشكيل ائديردي{13}.

ايره لي سورولن  مسئله لرله ياناشي ملي حكومت كئچميش مرتجع قضائي دستگاهيني لغو ائده رك، دئموْكراتيك پرنسيپلر اساسيندا يئني محكمه سيستمي تأسيس ائتدي. كهنه قورولوشی مدافعه ائدن ارتجاعي قانونلاري لغو ائديب، يئني مترقي قانونلار وئردي. تهران حكومتي نين يئريتدي يي ضررلي اقتصادي سياست نتيجه سينده وطنيميزآذربايجاندا هميشه حكم سورن ايشسيزلي يي آرادان قالديرماق اوچون، بؤيوك تدبيرلر حيات  كئچيرمه يه  باشلادي. كارگرلر اتحاديه سي ، جاوانلار و قادينلار تشكيلاتلاري دئموْكراتيك قورولوشون فعال كؤمكچيلري كيمي ايشه باشلادي.

شخصيّت توْخونولمازليغي تأمين ائديلميش، ايش و تحصيل حقوقونون تأمين ائديلمه سي اوچون جدّي تدبيرلر گؤرولدی. نمونه اوْلاراق تبريزده ، اورميه و زنگاندا 325 ابتدائي و 82 اوْرتا مكتب آچيلدي. بير چوْخ يئني ائولر، كولوبلار انشاء ائديلدي. كتابخانا و قرائتخانا تأسيس اوْلدی."معارف چاپخاناسي" و" آذربايجان چاپخاناسي"ياراندي. " آذربايجان شاعير و اديبلر جمعيّتي"،" اينجه صنعت اداره سي"،" دولت تياتري"، " آذربايجان ملي اوْركستر و فيلارموني"- سي تشكيل ائديلدي. تبريزده " بهزاد"  آدينا اينجه صنعت موزه سي تشكيل اوْلدی. پولسوز اوْلاراق كؤرپه لر ائوي، اوشاق باغچالاري  و قوْجالار ائوي ايشه باشلادي.

شهرلرين آبادليغي اوچون كوچه لره آسفالت دؤشندي، برق شبكه سي گئنيشلنديريلدي،سو كمرلري چكيلدي،50- يه ياخين مطبوعات اوْرقاني دوْغما آنا ديلينده نشره باشلادي.آذربايجانين برباد وضعيّتده اوْلان صحيه سينه جدّي فيكير وئريلمه يه  باشلاندي. نهضتدن اوّل آذربايجاندا خسته خانالاردا جمعا 70 تختخواب اوْلدوغی حالدا، ملي حكومت زاماني بو تختخوابلارين سايي 800- ه چاتدي.

ملي- آزادليق و دئموْكراتيك كاراكتر داشی یان آذربايجان ملي حكومتي يارانديقدان سوْنرا فارس شوْونيستلري نين آذربايجاندا تطبيق ائتدي يي مستعمره چيليك سياستي داغيلدي، صنعي صورتده ايكي- اووچ  يئره  پارچالانان آذربايجان اراضيسي  بوتؤو بير اؤلكه حالينا سالينماغا باشلادي. ملّتين اساس علامتلريندن ساييلان اراضي و اقتصادي حيات بيرلي يي نين برپا ائتديريلمه سي يئني دن اوْرتايا چيخدي. رضاشاه دؤوروندن ديليميزين و مدنيتيميزين انكشافينا مانعه لر يارادان تهران حكومتي آذربايجاندا فارسلاشديرما سياستني حياتا كئچيريرديسه، ملي حكومتين يارانماسي ايله دوْغما آنا ديليميز رسمي دولت ديلي  سه وييه سينه  قالديريلدي. خالقين مدنيّتينه، تاريخينه، ملي عادت- عنعنه سينه بؤيوك خدمتلر گؤسته ريلدي. ارتجاع قوّه لري نين آذربايجاندا اساسي داغيلدي. خالقا ظولم ائدن اؤلكه دن قاچميش ملكه دارلارين قدرتلري محو ائديلدي. كندلرده  اؤزباشيناليغين قارشيسي آليندي. توْرپاقسيز كندليلرين خيرينه بير سيرا مثبت عملي تدبيرلرين حياتا كئچيريلمه سينه باشلاندي.بیر حالداکی جامعه نین اجتماعی ترکیبی قاریشیق کاراکئرلی ایدی. صنایع یوخ ایدی، آلت یاپی انکشاف ائتمه میشدی، اکینچیلیکده  یاریم فئودال مناسبتلر و بسیط استحصال واسطه لری حکم سوروردی. اساساً ساوادسیز اولان خالق اؤز یازیلی ادبی دیلینی بیلمیردی. آذربایجان ادبیاتی انکشاف ائتمه میشدی. آذربایجان تاریخی تمامی ایله اؤیره نیلمه میشدی. ملی آزادلیق، دئموکراتیک حرکاتین غلبه سی آذربایجان خالقی نین اجتماعی- اقتصادی و مدنی انکشافی و دئمه لی اونون ملته چئوریلمه سی اوچون الوئریشلی شرایط و ضروری اورقانلار یاراتمیشدی. زحمتكشلرين حياتيني و ايش شرايطيني ياخشي لاشديرماق اوچون 52 ماده دن عبارت امك قانونی ايله ياناشي بيرچوخ دئموْكراتيك حقوقلار حياتا كئچيريلدي"{14}.

ايران دولتي و مرتجع دايره لرين اساس قوّه سينه چئوريلن ژاندارم و قوْشون حصّه سي نين آذربايجاندا مركزي داغيلدي. ملي حكومتين آذربايجان قيزيلباش خالق قوْشونلاري ياراتماسي، پول چاپ ائديب دؤورييه يه  بوراخماسي، اؤز مقدراتيني تعيين ائتمك پرنسيپي داخيلينده اؤز حليني تاپدي و خالقين مقدّراتي اؤز الينه تاپشيريلدي.

چوْخ جدّي اوْلاراق يئني كتابلارين نشرينه باشلاندي. كند تصرفاتي و صنايعني انكشاف ائتديرمك مسئله لري اوْتايا چيخدي. مؤوجود مادي چتينليك لره باخماياراق سيرادان چيخميش كارخانا و موسسه لر برپا ائديليب، يارارلي حالا ساليندي؛ يئني كارخانالار ياراندي. ملي مدنيّتيميزده ملي ادبياتيميزين دئموكراتيك قوْلی خالقيميزين عالم اوْغلي شيخ محمد خياباني دؤوروندن جوجرمه يه باشلاميشديسا، حيات صحنه سينده اؤزونی گؤسترمه يه  و تصديق ائتمه يه باشلادي. معارف و اينجه صنعتين ترقيسي اوچون گئنيش امكانلار خالقيميزين اختياريندا قوْيولدی. تبريزده دولت دانشگاهي آچيلدي. راديو و باشقا ملي- مدني اوْرقانلار ياراديليب اهالي نين  استفاده سينه  وئريلدي.

دولت بانگي نين تأسيسي، تجارت و صنايع نين جانلانديريلماسي ملي حكومتين قوروجولوق پروْقرامي نين اساس حصّه لريني تشكيل ائتدي. ملي اقليّتلرين ملي حقوق برابرلي يي تأمين ائديلدي؛ ياخين و اوْرتا شرق اؤلكه لري تاريخينده  بيرينجي كره اوْلاراق قادينلارين كيشيلرله برابر حقوقي تأمين اوْلدی. صنايع موسسه لرينده ايشچيلر نماينده سي نين نظارتي ياراندي. 

ملي حكومتين قيسا  بير مدت عرضينده سادالاماقلا قورتارمايان بؤيوك ايشلر گؤرمه سي، حياتا كئچيردي يي اصلاحات تدبيرلري، آذربايجان خالقي نين بلاواسطه اراده سي نين ايفاده سي اوْلدی.

" آذربايجان خالقي قوربانليقلار باهاسينا وطنينده ملي حكومت قوردی. بؤيوك قهرمانليقلادا خالق و اوْنون سيلاحلي قوّه سي اوْلان خالق قوْشونلاري و فدائي لرالده ائديلميش آزادليغي ساخلاماق اوچون  ووروشدی. آذربايجان ملي حكومتي نين بير ايلليك فعاليتي دؤوری خالقيميزين افتخاري اوْلماقلا اوْنون اونودولماز تاريخي نين قيزيل صحيفه سيني تشكيل ائتدي"{15}.

شبهه سيزكي، بو بير ايلليك فعاليت دؤورونی موفقيتله حياتا كئچيرمكده ملي حكومتين اوْرقانلارينا خالقين لياقتلي و صادق ائولادلاري سئچيلميش و فعاليت ائتمه يه باشلاميشدير.

آذربايجاندا ملي- آزادليق و دئموْكراتيك حركاتين جريانيندا فعله لردن، كندليلردن، مترقي ضياليلاردان، صنعتكارلاردان و ملي بورژوازي نماينده لريندن چوْخلي اجتماعي- سياسي خاديملر يئتيشدي.

ملي حكومت دؤورونده فدائي باشچيلاري، انجمن صدرلري، بخشدار لار، فرماندارلار، وزيرلر، كارخانالاردا فعله نماينده لري، اداره باشچيلاري، بانك مديرلري و ساير وظيفه لي شخصلر تجربه لي كادرلار كيمي تربيه اوْلونوب، ايره لي چيخيب، دولتين اداره ائتمه سي ايشينده  سفربر اوْلدیلار.

خالقيميزين عالم اوْغلي، شيخ محمد خياباني حركاتي نين تانينميش نماينده لريندن اوْلان، آذربايجان ملي حكومتي نين ملي محكمه سي نين صدري، زين العابدين قيامي نين شخصي آرشيوينده او دؤوردن يادگار قالميش بير سندده  "دولت كادرلاريني حاضرلا يان عالي كورسلارين معلملري"- نين سياهيسي ساخلانميشدير. بو سند تكجه معلملرين سياهيسيني دئييل، هم ده  كورسلاردا  تدريس اوْلونان موضوعلاري دا اؤزونده عكس ائتديرميشدير.

دولتچيليك تاريخيميزين سندلريني بير يئره  توْپلاماق، گله جك نسيللره چاتديرماق ضرورتیني نظره آلاراق، ملي دولتچيليك عنعنه ميزين قوروجولوق ايشينده گئجه- گوندوز بيلمه ين انسانلاريميزين سيراسينا داخيل اوْلان بو سند ده  بئله وئريلميشدي:

 

* آذربايجان ملي حركاتي نين تاريخي و مشروطه انقلابي -   زین العابدین قيامي

* تشكيلات سيستمي- صادق بادگان.

* ايران سياسي تشكيلاتلاري نين تاريخي- سلام الله جاويد.

* پسيكوْلوژيا- دكتر جاهانشاهلو.

* اينجه صنعتين اهميتي حكومت قورولوشی نقطه نظريندن- فريدون ابراهيمي.

* قانون اساسي- عظيما.

* مليت مسئله سي- دكترهشتروديان.

* سياسي اقتصاد- دكتر مهتاش.

* دنيا سياسي قوروملاري تاريخي- مايور رحماني.

* اوْردو مكتبي- اديب.

* مرامنامه نين شرحي- ميررحيم  ويلائي.

* آذربايجانين استراتژي جغرافياسي- ژنرال پناهيان.

* قديم آذربايجان تاريخي- شريفي.

* انشعات- مهندس آذري.

* حربي تعليمات و بدن تربيه سي- مايور آگاهي{16}.

بو و يا ديگر گؤرولن ايشلر و الده ائديلن موفقيتلر هئچ ده عادي وضعيتين نتيچه سي كيمي دئييل ، چوْخ آغير و گرگين اوْلايلاردان كئچميش ، حتي ملي حكومت يارانديقدان سوْنرادا آذربايجان عليهينه تهران حكومتي طرفيندن يورودولن ضد دئموْكراتيك تدبيرلر سنگيمك  بيلمه ميشدي.ايرانين14- جي مجلسينده مهدي فرخي نين خطابت كورسوسونده  سؤيله دييي :

" گئديره م آذربايجانا، آذبايجاني آذربايجانليلارين باشينا اوچورام!"-سؤزی، بيلاواسطه تهران حكومتي نين آذرربايجاندا يارانميش وضعيته مناسبتي نين گؤسته ريجيسي ايدي. بو مناسبت تكجه ايران مجلسي كيمي اوْرقاندا چيخيشلاردا، يا خود تكجه سؤزده محدودلاشميردي؛ آذربايجاندا فاجعه لر تؤره دن اوْردو حصّه لرينده بو مناسبتلر داها قاباريق شكيلده اؤزونی گؤسته ريردي. اورميه شهرينده کی، ياراديلان وضعيتی  بو اولايلاردان  نمونه  کیمی گوسترمک یئرینه دوشر.

ملي حكومتين ياراديلماسيندان هله 5- 4 گون كئچمه سينه باخماياراق ارتجاعچي تهران حكومتي نين اورميه ده  يئرله شن اوْردی حصه سي نين و خالقين قانينا سوساميش قولدور خانلارين سيلاحلي دسته لري نين تؤرتدي يي جنايتلر، آذربايجان خالقي نين عليهينه  يورودولن جنايتلرين داوامي ايدي.

" شانلي 21 آذر حركاتي آذربايجانين مختلف ولايت و شهرلرينده  مختلف واختلاردا غلبه چالميشدي. اورميه شهرينده ايسه بو غلبه يالنيز شدتلي ووروشمالاردان سونْرا، 27 آذر گونونده ممكن اوْلموشدور.

بونون سببي اوْندا ايدي كي ، هم بورادا ارتجاع اؤزی نسبتا گوجلي ايدي، هم ده توركيه و آمريكا قوْنسوللوقلاري همين ارتجاع قوّه لريني داها دا جدي مقاومت  گؤسته رمه يه  تحريك ائديرديلر. بوندان علاوه دربار و دولت سيمسيز تلفن و تئلگراف واسطه سي ايله بورادا كي حربي حصه لر: پوْليس و ژاندارم قوّه لری ايله علاقه ساخلايير، اوْنلارا سيلاح ، ارزاق ، عادي وسايط  و سايره وعدلر ائدير و بو يوْللارلا دا 21 آذر حركاتينا قارشي اورميه ده  جدي بير مقاومت مركزي ياراتماغا چاليشيردي. دربار و دولتين، عموميتله ارتجاعي قوّه لرين اساس استناد نقطه سي اوْلان حربي حصه لره  و بورادا اوْلان نسبتا اهميتلي حربي- تكنيكي بؤلمه لره، مشهور ارتجاع نؤكري سرهنگ زنگنه باشچيليق ائديردي. محمدرضا شاه شخصا اورمي نين مدافعه سي ايله ماراقلانير، سرهنگ  زنگنه يه  بؤيوك اميد  بسله يير و بوراني آذربايجان خالقي نين ملي آزادليق حركاتينا قارشي جدي مقاومت مركزينه چئويرمك ايسته ييردي. آذرآيي نين 26- سينا قدر فدائي دسته لري اورمي اطرافيندا اوْلان چهاربخش، سنگر و دره  ده ييرمان موضع لرينده ارتجاع قوّه لره- ژاندارم و نظامي دسته لرينه شدتلي هيجوملار ائتميش و بير سيرا حربي اوستونلوك لر الده ائتميش ديلر. تبريز و باشقا شهرلرين فدائي دسته لري ايله گوجلنديريلميش اورمي فدائي دسته لري تبريز- اورمي جاده سيني نظارت آلتينا آلا بيلميش و تمامی ايله شهر اطرافينا ياخينلاشميشديلار. آذر آيي نين 27- سينده هاوا قارانليقلاشان كيمي ژاندارملاردان  بير عدده سي بير نئچه اوْغري و قولدورلا  بيرليكده غفلتا كوچه لره تؤكولوب هر طرفه آتش آچاراق قاباقلارينا گلن سيلاحسيز اهاليني اؤلدورمه يه باشلاديلار. بير نئچه ائو و مغازاني غارت ائتديلر. عين حالدا بوتون گئجه ني شهري و فدائي دسته لري نين توْپلاشديق لاري يئرلري سربازخانالاردان تفنگ و مسلسل آتشينه توتدیلار. ارتجاع قوّه لري بئله ليكله حربي شورانين دقتيني بو آتيشمالارا جلب ائده رك اوْنون پرده سي آلتيندا  ايره ليله ين  نظامي و ژاندارم حصّه لري نين قُطور دره سي يوْلونی اله گه تيرمه لرينه امكان ياراتماق ايسته ييرديلر.لاكين، سرهنگ زنگنه نين بو تدبيري ده  باش توتمادي. آنجاق اوْنون بو جنايتي بيرعده سيلاحسيز اهالي نين ، فدائي و سربازلارين قاني  باهاسينا  باشا گلدي. تبريزدن گلن فدائي كؤمك دسته لري ايله اورمي فدائي لري بو وظيفه ني ده  لياقتله يئرينه يئتيرديلر.

1324- جي ايل آذر آيي نين 28- ده سحر ساعات 8- ده فدائي لرين حربي شوراسي نين صدري محمد امين آزاد وطن باشدا اوْلماقلا فدائي لرين اساس قوّه لري تبريز- اورمي  دروازاسيندان  طنطنه ايله شهره  گيرمه يه  باشلاديلار. بونونلا دا اورمي  شهري  تمامی  ايله  آزاد ائديلميش اوْلدی"{17}.

بو حادثه لرين باشقا يؤندن تصويريني،21 آذرحركاتينين اشتراكچيسي م. فخرزاده ایسه بئله وئرميشدي : تهران حكومتي هر يئرده مغلوبيته اوغراديغي اوچون اورميه ده كي سيلاحلي قوّه لريني داهادا  گوجلندير ميشدي. جلادليقدا مشهوراوْلان سرهنگ زنگنه نين اسير دوشمه سينه هله بير نئچه گون قالميشدي. قياما قالخميش دئموْكراتلارلا ايران قوْشونلاري آراسيندا اؤلوم- ديريم مبارزه سي گئديردي. زنگنه بوتون گوجونی شهرين مدافعه سينه وئرميش، اختياريندا اؤلان 4- جي لشگرين بوتون سيلاحلي قوّه سيني دئموْكراتلارا قارشي چئويره رك چارباش كندينده، شهر چايي وادي سينده، شهرده اوْلان سني لر مسجدي نين اطرافيندا و بير چوْخ باشقا يئرلرده چوْخلي استحكامات  دوزه لتميشدي. هزاران محله سي اطرافيندا گئدن ووروشمالاردا فدائي گول له لري نين سسي گئت- گئده  ياخينلاشيردي. شهر داخيلينده ايسه آيري- آيري محله لرده دئموكراتلار دؤيوش عملياتينا باشلاميش، داملار و ائولرده سنگرلر ياراتميشديلار.آغداش محله سينده  بير دسته فدائي نين گؤستردي يي قهرمانليق، انقلابي دؤيوشلرده باش وئرن بؤيوك فداكارليق نمونه سي كيمي اولموشدور.

اورميه اطرافيندا گئدن دؤيوشلرين قيزغين واختي ايدي. زنگنه كندلرده فدائي لرله  ووروشان ژاندارملارا سيلاح  و نظامي قوّه  گؤنده ريردي. گونده ريلن  قوّه لر ايسه آغداش محله سيندن كئچمه لي ايدي. بونا گؤره ده  بوردان گئچن حربي قوّه لرين محو ائديلمه سي آغداش محله سي نين قهرمان فدائي لرينه تاپشيريلميشدي. بو مقصدله بير دسته فدائي اوْنلار اوچون الوئريشلي اوْلان بير ائوي سئچميشديلر.

 سحر واختي ايدي. 24 نفردن عبارت بير كاميون مسلح نظامي دسته سي گؤي تپه كندينده فدائي لرله ووروشان ژاندارملارا كؤمك ائتمه يه گئديردي . فدائي لر همين ائودن كاميوني آتشه توتدیلار . مدافعه وضعيتينه كئچمه يه امكان تاپمايان سربازلار دسته سي داغيلدي  و 24 بيرنوْو تفنگي فدائي لرين الينه كئچدي. زنگنه اورميه ده اوْلان 6 تانك دان بيريني يالنيز بو 7 نفر فدائي ايله ووروشماق اوچون  گؤندرمه يه مجبوراوْلدی. تانك ائوه ياخينلاشير. اوْنون پوْلاد بورنی ائوين تاختا قاپيسينا دايانميشدي. سربازلار قاپيني سينديرماميشدان اوّل تسليم اوْلماغي طلب ائتديلر. ائوين تاختالانميش پنجره لرينه آتيلان ال قوْمبارا لاري فدائي لرين اوچ نفريني يارالاميشدي. الي تفنگلي فدائي لر ايكينجي اوْتاغين سقفيني دئشه ره ك، داما چيخيب تانكين دؤوره سينده  اوْلان سربازلارلا ووروشماغا باشلاديلار. سربازلارين چوْخی يارالانيب و بير عده سي قاچميشدي. بو زامان فدائي لر تانكين  ته كرلري ايله زنجيري آراسينا تاختا سالاراق اوْنون حركتينه مانع اوْلدیلار. فدائي لر تانكين ايچينده كيلري ده تسليم ائديب تانكي اؤز اللرينه كئچيرديلر.وطن و آزادليق عشقي ايله ووروشان قهرمان فدائي لر اورميه اوزه ريندن قارا بولودلاري قوْودیلار، آزادليق گونشي اؤز پارلاق شعاعلاري ايله  بو كهنه شهري ايشيقلانديردي{18}.

" اورميه لشگري نين فرماندهي سرهنگ احمد زنگنه نين خيانتي اوزوندن 2300 نفر قوْجا، قادين، اوشاق و فدائي هلاك اوْلدی. بونلاردان 230 نفر فدائي و 550 نفر فرقه عضوي ايدي. فدائي لردن 127 نفر يارالاندي. لاكين، بونا باخماياراق آذر آيي نين 27- سينه قدر آذربايجاندا اوْلان مركزي دولتين بوتون سيلاحلي قوّه لري خلع سيلاح ائديلدي"{19}.

فدائي دسته لرينده اوْلان حربي سيلاحلاردان قات- قات آرتيق حربي سيلاحلارلا تجهيز اوْلونموش تهران حكومتي نين حربي قوّه لري، متشكل حربي مكتبلر گؤرسه لرده آذربايجانين شهرلرينده و كندلرينده بير- بيري نين آردينجا مغلوبيته اوغراميشدي.

" شاه استبداد رژيمينه قارشي باشلانان 21 آذر نهضتي اؤز دؤورونون اجتماعي، اقتصادي و سياسي شرايط مجموعونون ياراتدغي تاريخي ضرورتين لابد نتيجه سي ايدي. بير سؤزله، بو نهضت ايرانين عمومي و آذربايجانين خصوصي شرايطي زمينينده عمله گلميشدي. 21 آذر نهضتي بيردن- بيره و تصادفا عمله گلن بير نهضت دئييلدي. اوْنون تاريخي كؤكلري چوْخ قاباق كي دؤورلره گئديب چيخير.21 آذر نهضتي اؤز تاريخي كؤكی اعتباري ايله مشروطه انقلابي، خياباني حركاتي وعموميتله ايراندا باش وئرميش ديگر آزادليق و دئموْكراتيك حركاتلارين وارثي  و اؤز دؤورونون اجتماعي كوْنفیلئكتلري نين  سيلاحلي عصيان فوْرموندا حلي نين تظاهري ايدي"{20}.

دئموْكراتيك طلبلر اوغروندا مبارزه هر ملتين انكشاف سه وييه سي ايله علاقه دار اوْلاراق مختلف دؤورلرده  مختلف فوْرمادا اؤزونی گؤسته رير. بو باخيمدان آذربايجان خالقي نين ملي شعورونون انكشافي باشلانغيج دا سؤز، مطبوعات ، ييغينجاق آزادليقلاري و ها بئله اؤز نماينده لري واسطه سي ايله مجلسده اشتراك ائتمك و سايره طلبي ايدي. بو قانوني طلبلرين بير طرفدن شاه رژيمي طرفيندن قبول ائديلمه مه سي، ديگر طرفدن دئموْكراتيك حركاتين انكشافي، قانونا اويغون اوْلان اوچونجی مبارزه مئتودی اوْلان-اؤز مقدراتينا صاحب اوْلماق اوغروندا مبارزه نی ضروري ائتميشدير."21 آذر نهضتي كئچميش انقلابي حركاتلاردان هم سياسي، هم ده اجتماعي مضمونی ايله فرقلنميشدي. شاهليق رژيمي نين جبر آپاراتي اوْلان قوْشون، پوْليس و ژاندارم اداره لري لغو ائديلدي. بونونلادا تهران حكومتي نين آذربايجانا مناسبتي نين باشقا مرحله سي اوْرتايا چيخدي"{21}."21 آذر نهضتي نه تصادفي و نه شخصلرين ايسته يي و غضبي و يا خود خير خواهليق نيّتي و نه  ده  سفارشله باش وئرمه ميشدي. او، ايرانين اقتصادي رژيمي نين ضروري  و لابد قانونی ايدي. باشقا سؤزله، 21 آذر نهضتي ايرانين عمومي وآذربايجانين خصوصي شرايطي زمينينده عمله گلميش و آذربايجان خالقي نين اوزون ايللردن بري ظولم واستثمارا قارشي آپارديغي مبارزه نين تجسمي ايدي{22}.

ايتي مشاهده و دقيق تحليل قابليّتينه مالك اوْلان ملي اؤندر سيدجعفر پيشه وري، يئني يارانميش مرحله ني بئله تقديم ائدير: تهران، ائشيتدي ييميزه گؤره، ايالت و ولايت انجمنلري نين انتخاباتيني باشلاماغا تشبث ائدير. بو چوْخ گئج دير. آرتيق انجمن بيزي تأمين ائده  بيلمز. بو دالدان آتيلان داش كيمي ديركي، فقط توْپوغا ده ير و هئچ بير تأثير باغيشلاماز{23}.

غلام يحيي دانشيان حرکاتین موفقیت قازاندیغی آنلاری خاطرلایاراق يازيردي كي، باش وزير پيشه وري عالي قاپي يا  گئتدي.

قوْشونون تسليم ائديلمه سيني مذاكره ائتمك اوچون سرتيپ درخشاني اوْرايا  گه تيريلميشدي. قوْشونون ستاد رئيسي سرهنگ ورهرام بوتون قوّه سي ايله افسرلري قان تؤكمه يه حاضيرلاييردي. او، شهر اهاليسي و فدائيلر اوزه رينه هيجوم پيلاني چكميشدي . قوْشونون تسليم اوْلماسي حاقيندا پيشه وري و درخشاني آراسيندا سند امضألانديغي حالدا ،  ورهرام مقاومت گؤسترمك ايسته ييردي. لاكين، سربازخانايا گئتميش چشم آذر افسرلره  و سربازلارا  تسليم سندي نين امضالانماسي خبريني سؤيله ييب ، ملي حكومت آديندان اوْنلارا اطمينان وئرديكدن سوْنرا افسرو سربازلار سيلاحلاريني  يئره  قوْيماغا راضي اوْلدیلار. ورهرام دا سيلاحيني وئريب تسليم اوْلدی{24}.

" دئسامبرين 12- ده (چهار شنبه 21 آذر 1324) ملي مجلسين ايلك اجلاسي اوْلدی. و همين اجلاسدا ملي حكومت تشكيل ائتمك قرارا آليندي. آذربايجان دئموْكرات فرقه سي نين بيرينجي كاتبي سيدجعفر پيشه وري حكومته باشچي تعيين اوْلونموش و ائله همين گون حكومت عضولريني ملي مجلسه تقديم ائتميشدير.

ملي حكومت 11 وزيرليكدن، عالي محكمه و باش مدعي العموملوقدان عبارت  ايدي. حكومتين تركيبينده خارجي ايشلر وزيرلي يي و مدافعه وزيرلي يي نظرده توتولماميشدي. بودا آذربايجان خالقي نين ايرانين دولت بيرلي ييني قوْرويوب ساخلاماق نيتيني تصديق ائديردي. ملي حكومتين تشكيليندن سوْنرا آذربايجانليلارين سياسي جهتدن فوْرمالاش ميش ملّته چئوريلمه سي  پروسئسي  باشا چاتير و اؤز مقدراتيني تعيين ائتمك و حاكميت حقوقلاري حياتا كئچير. بئله ليكله ، اؤز ائتنيك اراضيسي و بوندان سوْنرا هم ده سياسي اراضيسي، اؤز ملي ديلي و بوندان سوْنرا دولت ديلي، اؤز قانون وئريجي و اجرا ائديجي حاكميت اورقانلاري و ملّتين بوتون طبقه لريني احاطه ائدن رهبر حزبي اوْلان آذربايجانليلار تشكيلات جهتدن ملي تشكّولی باشا چاتديرير و هم ده  بو زامان تكجه يوكسك مترقي، دئموْكراتيك، سياسي، وطن پرورليك شعوری دئييل، هم ده ملي شعور نمايش ائتديريرلر.

 ملي دولت قوروجولوغونا باشلانماسيندان سوْنرا آذربايجان خالقي نين انكشافيندا، اوْنون فوْرمالاشماسيندا يئني مرحله باشلايير. آذربايجانلي لارين ملت كيمي حقيقي اجتماعي فوْرمالاشماسي، ملي شعورون ائنينه  و درينينه ياييلاراق فوْرمالاشماسي محض همين واختدان باشلانير دي"{25}.

سید جعفر پیشه وری یازیردی کی، باشلادیغیمیز بؤیوک حرکتین ملی رنگ و ملی خاصیّتینی ده ییشدیرمک ایسته ینلر خالقیمیزین سیلاحینی الیندن آلماغا چالیشیرلار .

حرکاتین رهبری علاوه ائدیردی کی،آزادیخواه اولان آداملار بیر ملتین باشقا  بیر ملتین اوزه رینده حاکمیت سورمه سینی طلب ائده  بیلمز.

آزادیخواهلیق حالوا دئییلدیر. آزادیخواه انسانلار گره ک حق و حقیقتی انکار ائتمه سینلر. حق و حقیقت ایسه آذربایجانلیلارین ملی حقوق، ملی دیلی، ملی آداب و رسومی، ملی اخلاق ، ملی استعداد و ملی تاریخلری دیر. تهران" آزادیخواهلاری" بیزیم ملیتیمیزی انکار ائتمکله قابا و خشن استبداد روحینه مالک اولوب مرتجعلردن داها مرتجع اولدوق لارینی اثبات ائدیرلر. آذربایجان خالقی ایسه اؤزونون قدریتنی ملی بیرلیک و ملی آزادلیقدا تاپمیشدیر. ایندی آذربایجان ملی بیر اؤلکه دیر{26}.

" ملي مجلس آذربايجان ملي حكومتي نين قارشيسيندا آذربايجانين انكشافينا داير كونكرئت وظيفه لر قوْيموش و اوْنون 20 ماده دن عبارت ايش  پروْقراميني دا  تصديق ائتميشدير.

آذربايجان ملي حكومتي تشكيل اوْلدوغی ايلك گوندن خالقا آرخالاناراق اؤزونون ناظیرليكلري واسطه سي ايله دئموْكراتيك تدبيرلر حياتا  كئچيريلمه سينه باشلايير. عالي اجرا ائدیجی اوْرقان اوْلان ملي حكومت اؤز فعاليّتيني  بيلاواسطه خالقين احتياجلاريني، طلبلريني تأمين ائتمه يه يؤنلتميشدير.

ملي حكومتين باشچيسي سيدجعفر پيشه وري دئميشديركي ، حكومت اؤز پروْقراميني خالقين احتياجي اوزه رينده قورموشدور. بيز بو پروقرامي خالقين مذاكره سينه وئريريك. خالقين به يندي يني  حياتا  كئچيره جه ييك ؛ به ينمه دي يني ايسه پروْقرامدان چيخاراجاييق.

آذربايجان ملي حكومتي نين پروْقرامي آشاغيداكي اساس حصّه لره بؤلونموشدی:

    الف- سياسي و حاكميت مسئله لري؛

    ب - اقتصادي و تجارت مسئله لري؛

    ت- مدنيّت، معارف و صحيه مسئله لري؛

    پ- ملكيت مسئله لري"{27}.

آذربايجان ملي حكومتي نين دولت آپاراتي اوچ  قوّه دن عبارت ايدي:

   1- قانون وئرجی اورقان- آذربایجان ملی مجلسی.

   2- اجرا ائديجي اوْرقان- آذربايجان ملي حكومتي.

   3- محكمه و پراكروْرلوق اوْرقانلاري.

" آذربايجان" روزنامه سي  بو حاقدا بئله بير معلومات درج ائتمیشدیر: آذربايجان مجلس ملي سي دونن گون اوْرتادان قاباق كي جلسه سينده آذربايجان دئموْكرات فرقه سي نين رئيسي آقاي پيشه وريني آذربايجان ملي دولتين تشكيل  وئرمه يه  نامزد و مأمور ائتدي . آقاي پيشه وري گون اوْرتادان سوْنرا كي جلسه ده اؤز كابينه سيني آشاغيدا قيد اوْلان تركيبده  مجلس ملي يه معرفي ائتديلر:

1-   باش وزير- آقاي سيدجعفر پيشه وري.

2-   داخله وزيري- دكتر سلام الله جاويد.

3-   خالق قوْشونلاري وزيري- آقاي جعفر كاويان.

4-   فلاحت وزيري- دكتر مهتاش.

5-   معارف وزيري- محمد بي ريا.

6-   صحيه وزيري- دكتر اوْرنگي.

7-   ماليه وزيري- آقاي غلامرضا الهامي.

8-   عدليه وزيري- آقاي يوسف عظيما.

9-   يوْل، ‌پوْست ، تئلگراف و تلفن وزيري- آقاي كبيري.

10- تجارت و اقتصاد وزيري- آقاي رضا رسولي

11- ايش و زحمت وزيري تعيين اوْلونانا كيمي او وزارتخانايا    مربوط اوْلان ايشلره  باش وزيرليك نظارت ائده جكدير.

" آذربايجان" روزنامه سي يازيركي، كابينه معرفليك اوْلدوقدان سوْنرا اتفاق آرا ايله تصويب اوْلوب سوْنرا مجلس طرفيندن آقاي زين العابدين قيامي ديوان تميزين رياستينه و آقاي فريدون ابراهيمي آذربايجان مدعي العموميلي يينه انتخاب اوْلدیلار. آقاي پيشه وري اؤز دولتي نين برنامه سيني گئنيش صورتده تشريح ائديب و آذربايجان ملي حكومتي نين پروقرامني قرائت ائتديلر{28}.

ملي اؤندر سيدجعفر پيشه وري ايسه بو حاقدا اؤز دوشونجه سيني بئله ایضاح ائدیردی:- دوْغری دیر، پيشه وري آذربايجان دئموْكرات فرقه سي نين آغ ساققاللاريندان حساب اوْلونور و آذربايجان مجلس ملي سي اوْنا اعتماد ائديب ملي حكومتين باشيندا قوْيموشدور.لاكين، او هئچوقت خود سر و مطلق العنان دئييلدير. او، بيرينجيسي نين دستوري، ايكينجي سينين آرزوسی اوزه رينده  حركت ائدير{29}.

" اجراء ائديجي اوْرقان اوْلان وزيرلر شوراسي قانون وئريجي اوْرقان اوْلان مجلسدن تمامي ايله آيری ایدی. ناظیرلرين تعييني باش وزيرين حقوقونا داخيل ایدیسه، اوْنلارين تصويبي ملي مجلسين وظيفه سينده ایدی. محض بونا گؤره ده يوخاريدا گؤستردي ييميز دئموْكراتيك پرنسيپلر اساسيندا قورولموش آذربايجان ملي حكومتي آذربايجان خالقي طرفيندن اوْنون قارشيسيندا قوْيولموش آغير و چتين وظيفه لرين عهده سيندن شرفله گلدي.لاکین،آذربايجان ملي حكومتي الده ائتميش اوْلدوغی بو موفقيت و انكشافي ايله  كفايتله نه  بيلمزدي. آذربايجان خالقي بؤيوك قوربانلار باهاسنيا الده ائتميش اوْلدوغی خالق حاكميّتيني انكشاف ائتديريب و اوْني داها دئموكراتيك پرنسيپلر اوزه رينده  قوروماق ايسته ييردي. بونون اوچون كهنه حاكميت آپاراتيني تمامي ايله سينديرماق و محو ائتمك لازيم گليردي.

آذربايجان خالقي نين سئويملي رهبري سيدجعفر پيشه وري بو حاقدا بئله یازيردي:- بيز ايسته ييريك كي، خالق ساوادلي اوْلسون، وجدانلا ياشاسين. خالقين بهداشتي و صحتي تأمين اوْلسون. شهرلر ياشاماغا يارارلي بير حالا گلسين. خالقين تأميناتيّه سي فراهم ائديلسين. بو او شئي ديركي، هميشه بيزي دوشوندورور و ناراحت ائدير. بو ماشين بئله ايشلره  قادر دئييل . بو سببدن ديركي، آذربايجان ملي حكومتي ايران دولتي نين ارتجاعچي اصول اداره سينه سون قوْيماق اوچون جدي صورتده ايشه باشلادي"{30}.

سیدجعفر پیشه وری یازیردی کی، خالقیمیز سیاستده سردارملی نین تهرانا گئتمه دن قاباق تعقیب ائتدی یی یول ایله گئتمه لی، اونا تقلید ائتمه لی دیر.

ایره لی سورولن بو مدعالارین حیاتا کئچیریلدیینی تصدیقله ین غربی برلين ده نشر اوْلان " وارهايت " روزنامه سي يازيردي کی ، دئموكراتيك قورولوش كهنه دولت دستگاهيني لغو ائديب، اوْنون يئرينده ايران آذربايجاني نين بوتون شهر و ماحاللاريندا دئموكراتيك حاكميّت اوْرقانلاريني ياراتدي. يئني توْرپاق اصلاحاتي كئچيريلدي. اوْن ايللرله قان ايچن جلاد شاه رضا خان و اوْنون جنگاور اوْغلي محمد رضا شاه پهلوي طرفيندن اسارت آلتيندا قالميش و تاپدالانميش آذربايجان ديلي  و اوْنون مدنيتي آزاد ائديليب  برپا اوْلوندی.  قيسا بير مدتده چوْخ مترقي شاعيرلر و يازيچيلار مدنيت عالمينده اؤز لايقلي يئرلريني تاپديلار. اوْنلار اؤز اثرلري ايله دئموْكراتيك قورولوش و اوْنون مقصديني مدافعه ائتميش و خالقا چاتديرميشلار.

ايران مدنيّتي تاريخينده بيرينجي دفعه اوْلاراق ايران آذربايجاني نين پايتختي تبريز شهرينده دارالفنون تشكيل اوْلوندي . همين دارالفنونا آذربايحان دئموْكرات حكومتي طرفيندن بوراخيلميش بودجه نين اوچده بير حصّه سي كهنه شاه رژيمي نين مدني ايشلر اوچون بوتون ايران آذربايجانينا آييرديغي  وسايطدن قات- قات آرتيق ايدي.

" وارهايت"روزنامه سي علاوه ائديركي، زحمتكئشلر اوچون اجتماعي  بيمه  قانونلاري و آيري مترقي قانونلار اعلان ائديلدي{31}.

" رزم" روزنامه سي ایسه يازيردي كي، آذربايجان خالقي ايللر بوْيی تحقير ائديجي اسارته دؤزندن سوْنرا نهايت ، فاشيزمين سقوط ائتمه سيندن و ايرانين ديكتاتورلوق رژيمي نين سارسيلماسيندان استفاده ائده رك 1324- جي ايلين آذرآيي نين 21- ده قيام ائتدي. بو غالبيّتلي قيامين نتيجه سينده آذربايجاندا خائن و چوروموش تهران حاكميتي ييخيلدي  و اوْنون خرابه لري اوزه رينده  زحمتكئشلرين حاكميتي قورولدی{32}.

" رزم" روزنامه سينين ملي حكومتي زحمتكشلرين حكومتي آدلاندير ماسي مسئله سي، بوراداجا بير خاطره يازيدان قيسا بير چيخاريش وئرمه يه اساس یارادیر.خاطره يازي 21 آذرحركاتي نين اشتراكچيسي

ع.هدايت نژادين  قلمينه مخصوص دور. بو خاطره يازي بئله باشلايير: 21 آذر نهضتيندن بير نئچه گون كئچميشدي. تبريز شهرينده بؤيوك جانلانما و هيجان واريدي . سحر واختي من ، 8- جي ناحيه نين قاپيسيندان چيخان كيمي  بير نفر جاوان اوْغلان منه ياخينلاشاراق:- سالام  فدائي قارداش!- دئدي.

او، قاراداغين ماواسخان ماحالي نين كندليلريندن اوْلان محمد ايدي. فرقه طرفيندن اوْنلارين كندينه فدائي يازماغا هله نماينده  گؤنده ريلمه دي يي اوچون او، اؤزي فدائي اوْلماقدان اؤتري شهره گلميشدي. آنجاق محمد تك دئييلدي. فدائي اوْلماق اوچون اوْنونلا  كنددن گلنلر چوْخ ايدي. محمد اوْنلارين هاميسي نين طرفيندن دانيشاراق:- بيز هاميميز كؤنوللی اوْلاراق ملي حكومتين فدائيسي اوْلماق اوچون شهره گلميشيك!

- دئدي. بو كندليلر شهرده هئچ  بير يئري تانيماديقلارينا گؤره فدائي يازيلماق اوچون مندن كؤمك ايسته ديلر. من اوْنلاري دژبانا آپارديم.

علي اكبر هدايت نژاد خاطره يازيسيني بئله داوام ائدير: بو حادثه دن بير نئچه گون كئچميشدي. آذربايجانين بعضي ماحاللاريندا اوْلدوغی كيمي، قارا داغدا دا فئوداللار باش قالديرميشديلار. قارا داغا، عبدالله خانلا  ووروشماق اوچون تبريزدن فدائي  گؤنده ريليردي.

آزادليق اوغروندا قوردوقلاري خوشبخت حياتي مدافعه ائتمه يه گئدن بو فدائي دسته سي نين اؤن سيراسيندا دوران بير گنج منيم نظريمي اؤزونه جلب ائتدي. گنج اوْغلان محمد ايدي. او، اؤز يوْلداشلاري ايله برابر، دوْغما وطني نين آزادليغيني بوْغماغا چاليشان فئوداللارلا ووروشماغا  گئديردي{33}.

ملي حكومت قورولدوقدان سوْنرا تبريزه گلن نماينده هيئتلريندن بيرينه داخيل اوْلان ابوالحسن عميدي نوری يازيرکی، من تبريز شهرينه چاتان كيمي ايلك باخيشدا مركزي دولتين آذربايجانا ياخشي باخماديغيني مشاهده ائتديكده،تبريز اهاليسينين ايرانا نسبت ملي احساساتيني گؤردوكده، كئچميشده بعضي دولت مأمورلاري نين كوْبود رفتاريني و اهالينين اوره يي نين يارالانديغيني ائشيتديكده اعتراف ائديب دئديم كي، آذربايجان مركزين ظولمكارلیغینا قارشي عصيان ائتمه يه حاقليدير.

عميدي نوري باشقا بيرستادي بئله وئرير:دئموْكراتلارين منتظم قوْشون دسته لري،فدائي لري اللرينده سيلاح حربي مارش حاليندا،"ستار خان"  يا " آذربايجان" سؤزی ايله قورتاران سرود اوْخويوردیلار. هم  بو حصّه لرين، و هم ده بونلارين آردينجا حركت ائدن يئني يئتمه لرين سيمالاريندا اوْلان  شادليق و غرور علامتلري  چوخ  هيجانلانديريجي ايدي. بيز بونی  اؤز گؤزوموزله  گؤردیك.

او، تبريزدن باشقا آذربايجانين ديگر شهرلريندن- او جمله دن خوي شهریندن بئله صحبت آچير:‌خوْي شهرينين روشنفكرلرينين صحبتيندن معلوم اوْلوردی كي ، 25 ايل تمام بو شهرين خيابانلارينا ال  وورولماميش ، آنجاق آذربايجان دئموْكرات فرقه سي نين رهبرليك ائتدي يي بلديیه اداره سي اوْنون كوچه لريني دوزلتديرمك، آرخ لار چكديرمكله مشغولدور. كئچميشده  كوچه لره آغاج اكديريب، ايندي يئنه ده اكديرمكده دير.ايكي آي دير كي، خوْي شهري نين نظميه خيابانيندا  800- 700نفرتاماشاچي توتان بير تياترسالوْني ايشه سالنميشدي{34}.

" رهبر" روزنامه سي ايسه بئله يازيردي: تبريز راديو ايستگاهي نين تأسيسي خبري وايران آذربايجانينين قدرت مركزيندن خبرلر و موسيقي  وئريليشلري نين ياييلماسي اوْني گؤسته ريركي ، ايران آذربايجانيندا  دورغونلوق و گئريلي يين  يئريني  ياشايش و غلبه يه  دوْغري  ياريش توتموشدی.بو مسئله ني قهرمان آذربايجان خالقينا قارشي تهمت آتانلارا چاتديرماق لازيمدير. ياريمچيق قالميش بير اوْپراني نئچه ايللردن سوْنرا دوزه لديب باشا چاتديرا بيلمه ين تهران، آذربايجانين نئجه بير سرعتله اؤزوني احيا ائتمه يه  دوْغری  ايره ليله دي ييني گؤرمه ليدير. بو  ايره ليله مه  و او  دورغونلوغون  سببي اوْدوركي، تبريزين قدرتي حاضردا  ملّته  آرخالانميشدير{35}.

آیت الله عبدالله مجتهدی، 26 آذر1324- جی ایل، دوشنبه گونی اوچون یازیرکی، بیر آی سون حادثه لرله باغلی، شهرده عادی وضعیت چتین اولموشدی.شنبه گونوندن امنیّت یارانمیشدیر. دئمک اولارکی، 1320-جی ایلین شهریورغائیله سیندن  بو طرفه  بو امنیتین تایی- برابری اولمامیشدی{36}.

آذربايجان ملي حكومتي، خالقين اؤز الي ايله يارانديغينا گؤره، اوْنون اجتماعي، سياسي داياغي دا خالق كوتله لري ایدی.

" آذربايجان ملي حكومتي آذربايجان خالقي نين كؤمه يي ايله بير ايل عرضينده خارق العاده ايشلر گؤردی.طبيعي ديركي، ملي حكومتين و خالقين خلاقه قدرتي نين گؤردويی ايشلر بونلارلا اؤلچولمز. او، آذربايجان ملّتينه آزاد ياشاماق، ملي آزادليق يوْلوني اؤيرتدي . و اوْنون لذّتيني آنلاتدي"{37}. " بو نهضت بير طرفدن مشروطه نهضتي و شيخ محمد خياباني قيامي نين آردي و ديگر طرفدن قيزيلباشلار و دونبه لي لر حركاتي نين داوامي ايدي. بو نهضتي درك ائتمكدن اؤتري آذربايجانين سوْن 400 ايلليك تاريخيني  ورقله مك  لازيمدير"{38}...

آذربايجانين فخرائديله سي افتخارلي تاريخي مقاملاريني ياد ائدركن بير چوْخ شاهيدي اؤلماديغيميز اوْلايلار باشقا- باشقا واسطه لر فوْنوندا تظاهر ائدير. تاريخين اؤزی، سياست و ادبيات ايسه او واسطه لردن نمونه لردير.بو معنادا دئمك اولاركي، تاريخده و سياست ده  ديل نه قدر قوري و رسمي ديرسه، ادبيات ديلي خالقين معنوياتينا، عادت - عنعنه سينه،معيشه تينه ، اوْنون وارليغينا اساسلانديغينا گؤره مونس دير، صميمي دير و دوْغمادير. تاريخ و سياست اؤز يئرينده ، ادبيات دنياميزين بير قولونی تشكيل ائدن خاطره لر، شاهدي اوْلماديغيميز بير چوْخ حادثه لردن، واقعه لردن خبر وئرير. هانسي تاريخي اوْلايدان خاطره چوْخ يازيليرسا، كئچميشده قالميش همن تاریخی حادثه  تدقيقاتدا اؤز يئريني داها دوزگون و آيدين تثبيت ائتميش اوْلور. آخي تاريخي حادثه لرين فونوندا جريان ائدن اوْلايلار، اشتراكچيسي اوْلانلارين خاطره لرينده  داها دقيق  اؤز عكسيني تاپير.

بو باخيمدان ملي حكومتين موفقيتلي گونلريني تصوير ائدن خاطره لر سيراسيندا خالق شاعيري بالاش آذراوْغلي نين قلمه آلديغي بير خاطره يازيني بوراداجا گه تيرمك،او دؤورون رئالليغيني گؤسترمك باخيميندان يئرينه دوشر. خالق شاعيري بالاش آذراوْغلي خاطره يازيسيني بئله قلمه آلير: 1946- جي ايلين يايي ايدي. اردبيلده ايديم. تبريز شهريندن تقي شاهين نين امضاسي ايله تئلگرام آلديم. تقي شاهين باش وزير، آقاي پيشه وري نين كاتبي ايدي. مني تعجيلي تبريزه چاغيريرديلار. مسئله نين نه ايله علاقه دار اوْلماسيني اؤيرنمك اوچون تبريزده اوّلجه " آذربايجان" قزئتينين رئداكسياسينا، مدينه گولگونون يانينا گئتديم. مدينه قزئتين مخبري ايدي.اوْدا نه اوچون چاغريلديغيمي بيلميردي.اوْدوركي، بيرليكده باش وزيرلي يه، شاهينين يانينا گئتديك. شاهين، پيشه وري نين ايش اوْتاغي نين قاپيسيني بير آز آرالاياندا ، گؤردوك كي ، پيشه وري يازي ميزي نين آرخاسيندا باشيني قوْللاري اوستونه قوْيوب ياتيب. شاهين دئدي كي، سوْن آيلار گونلرله ائوه گئتمه ييب، سحره  قدر ايشله يير و بعضا ده آنجاق بئله جه  مورگوله يير.

بيز، گؤزله مه لي اوْلدوق. چوخ واخت چكمه دي كي، اوْتاغين قاپيسي آچيلدي، پيشه وري بيزي كابينئته دئييل، حه يطه دعوت ائتدي.

آذراوْغلي یازیركي،اردبيلده كي وضعيّت حاقيندا سوْروشاندان سوْنرا ، او دئدي : ايكي  گوندن  سوْنرا  سن، اسماعيل شمس  و ميلاني تهرانا ، ايران يازيچيلاري نين بيرينجي قورولتايينا گئتمه لي سي نيز. ايرانين بوتون ايالتلري نين اشتراك ائتدي يي قورولتايدا اونودمايين كي، سيز آذربايجان ادبياتيني تمثيل ائديرسي نيز. آذربايجان ادبياتي نين بوتون عصرلرده شرق ده يوكسك مؤوقعي اوْلموشدور؛ اؤزونوزی اوْنلارين وارثي كيمي آپارين.

خالق شاعیری بالاش آذراوْغلي يازيركي ، تهراندا قورولتاي نماينده لري اوچون مشهور نادري مهمانخاناسيني آييرميشديلار. و علاوه ائديركي ، قورولتايا نؤوبه ايله ايرانين گؤركملي ادبيات شناس و شاعيرلري صدرليك ائديردي. آذربايجاندان گلميش نماينده هيئتي نين نؤوبه سي قورولتايين ايكينجي گوني ايدي. اوْدوركي، بير گون قاباق قورولتايين مسئوللاريندان كريم كشاورز بيزه  خبردارليق ائدنده من اوْنا دئديم كي،شعرلريمي آنا ديلينده يازيرام، آنا ديلينده ده اوْخوياجاغام. بو سؤزدن سوْنرا كريم كشاورز تعجبله اوزومه باخيب دئدي:- آقاي آذراوْغلي، قورولتاي آخيرا قدر ايرانين رسمي دولت ديلي اوْلان فارس ديلينده  گئده جك.

 چوْخ  جدّي  شه كيلده  دئييلن  بو  سؤزلردن  اينجييه جه ييمي  باشا دوشوب، تئز و ملايم شكيل ده علاوه ائتدي: ايراندا اوْندان چوْخ ملّت ياشايير؛هاميسي دا قورولتايا نماينده گؤنده ريب،اگر هر ملّتين شاعیري اؤز آنا ديلينده چيخيش ائتسه، فيكير ائدين كي، نه وضعيّت آلينار؟

من دئديم: يعقين اوْنلار فارس ديليني ياخشي بيلير. شعرلريني ده فارسجا اوْخوياجاقلار. من ايسه چوخ  تأسف كي، گؤزه ل فارس ديليني ياخشي بيلميره م. بير ده من قورولتايا آذربايجان ادبياتي نين نماينده سي كيمي گلميشم. اگر ممكن  دئييلسه ، صاباح  قاييديب  گئده رم .

منيم بو سؤزلريمدن سوْنرا كشاورز دئدي كي، اجازه وئرين گئديب مصلحتله شيم . من حس ائتديم كي، سؤزلريم اوْنا تأثير ائديب. آخي ملي حكومتين تزه تشكيلي،آذربايجاندا انقلابين هاواسي نين هله سوْيوماديغي واختدا  آذربايجان  نماينده سي نين  قورولتايي  ترك  ائتمه سي  يقين يوخاريلاردا سؤز-  صحبته سبب اوْلا  بيلردي...

كريم كشاورز تزه  بير تكليفله  قاييديب گلدي: - آقاي آذراوْغلي ، سيز شعرينيزي آذربايجان ديلينده اوْخويورسونوز، آقاي اسماعيل شمس اوْنون مضمونونی فارس ديلينده  دانيشير؛ راضيلاشديق.

قورولتايين ايكينجي گونونه صدرليك ائدن آقاي ملك الشعرا بهار ايدي. صدر منه سؤز وئردي . چيخيب مشهور مشروطه قهرماني ستارخانا حصر ائتدي ييم شعريمي اوْخودوم. ستارخانين آدي گلنده  دينله ييجي لرين گورولتولي آلقيشلاري ائشيديلدي.بو آلقيشلار مني اوره كلنديردي، شعري داها دا حرارتله اوْخوماغا باشلاديم؛ شعرين هر بندي قورتاراندا آلقيشلار تكرار اوْلونوردی. من تريبونادان دوشنده صدر بهار، آياغا قالخيب مني قوجاقلادي. قورولتايين نشاني" فردوسي" مئداليني ياخاما تاخا- تاخا منه دئدي :- مندن آقاي پيشه وري يه  سالام سؤيله يين؛ من داخيلن دئموْكرات آدامام  و سيزين حركاتا مثبت مناسبت بسله ييره م.

آذراوْغلي يازيركي، تنفس زاماني قورولتاي اشتراكچيلاريندان بؤيوك بير دسته مني آرايا آلدي. كيمي مني ملي حكومتين تشكيلينه گؤره، كيمي ده شعريمه گؤره تبريك ائديردي. ان ماراقليسي بو ايدي كي ، تبريك ائدنلرين ايچينده كريم كشاورز ده  وار ايدي. اوْدا  شعريمه گؤره مني ياري توركجه، ياري فارسجا تبريك ائتدي.

بالاش آذراوْغلي تبريزه  قاييداندان سوْنرا، تبريزده كي" مدني رابطه جمعيّتي"- نين گولستان باغينداكي، سالوْنوندا قورولتايلا باغلی يازير كي،ييغينجاغين سوْنوندا چيخيش ائدن آقاي پيشه وري قورولتاي حاقيندا بعضي ملاحظه لريني سؤيله يندن سوْنرا دئدي:- آقاي آذراوْغلي چوْخ ياخشي ائديب قورولتاي دا آنا ديلينده چيخيش ائديب. بيز هامي يا چاتديرمالي ييق كي، آذربايجان ديلي بيزيم هم آنا ديليميز، هم ده  رسمي دولت ديليميزدير{39}.

ملی حکومت دؤوریندن اولان بو ویاخود بونا بنزر دیگر یازیلان خاطره لر بونی گوسته ریر کی،آذربايجان خالقي باشا دوشموشدی كي، اوْنلارين منافعي ايله علاقه داراوْلان تدبيرلر آنجاق ملي حكومتين ياشاماسي ايله حياتا كئچيريله بيلر." سياسي حاكميته چاتميش آذربايجان خالقي اؤز اقتصادياتيني و مدنيّتيني دئموْكراتيك اساسلار اوزه رينده  قورماغا و انكشاف ائتديرمه يه  باشلاميشدير. اؤلكه ده  خالقين اؤز الي ايله ياراديلميش ملي دئموْكراتيك قورولوش گئنيش خالق كوتله لري نين اراده و منافعيني تمثيل ائتمكله برابر ياخين  و اوْرتا شرق خالقلاري تاريخينده علامتدار حادثه اوْلموش، ايستر ايران داخيلينده، ايسترسه ده قوْنشی اؤلكه لرده  گئدن خالق حركاتي نين سوْنرا كي، انكشافيندا مثبت تأثير ائديجي روْل اوْيناميشدير"{40}.

" 1325- جي ايلده پاريس ده نشر اوْلان " لوموْند" روزنامه سي نين او زامان عراقا حصر ائتدي يي بير مقاله سينده آذربايجان نهضتي نين شرقه تأثيريندن دانيشاركن  يازميشدي : ايران آذربايجاني نين حادثه سي و بو ولايت ده  بيرانقلابي نهضتين وجودا گلمه سي اوْرتا شرقده، خصوصي ايله عراقدا چوْخ  درين عكس العمل  وصولا گه تيرميشدير. عراق اؤلكه سينده  چوْخ  شدتلي سئنزوْر اوْلماسينا باخماياراق بو خبر ايلديريم سرعتي ايله ياييلميشدير. ظولم  و فشار آلتيندا ياشايان ايران خالقي دا بوتون اوْرتا شرقين اهاليسي كيمي آذربايجان نهضتيني اوْرتا شرقه نجات وئرن بير نهضت آدلانديرميشلار. بو، 1325- جي ايلده آذربايجان نهضتي نين اوْرتا شرقده اوْياتديغي انقلابي احوال- روحيه نين اوروپا اؤلكه لريندن ائشيديلن عكس صداسي ايدي{41}. ايران داخيلينده كي مناسبتلره گلديكده " آذربايجان حادثه لريندن روحلانان بوتون مترقي قوّه لر بؤيوك شهرلرده ، قصبه و كندلرده ميتينگلر و ييغينجاقلار كئچيرميش، بو خالق حركاتي نين مدافعه سينه قالخميشلار. او زامان آذربايجان دئموْكرات فرقه سي نين ، ملي حكومتين  و ملي مجلسين آدينا مملكتين مختلف يئرلريندن كلي مقداردا مكتوبلار و تئلگرافلار گؤنده ريلميشدي . بوتون  بو مكتوبلارين  و تئلگرافلارين هاميسيندا آذربايجان خالقي نين استبداد و سلطنت رژيمي اوزه رينده كي،تاريخي غلبه سي آلقيشلانماقلا  ياناشي، نهضتين ايره لي سوردويی طلبلر قيزغين صورتده مدافعه اوْلونوردی. بو جهتدن لاهيجان اهاليسي نين ايران دولتينه و ملي شورا مجلسينه گؤندردي يي تئلگرام،خصوسي ايله سسيستان كندليلري نين" رهبر" روزنامه سينده چاپ ائديلميش تئلگرامي اوْلدوقجا ماراقلي دير.

لاهيجان آزاديخواهلاري مجلس شوراي ملي دن و دولتدن طلب ائديرديلركي، آذربايجانليلارين مشروطيت اصولونا اويغون اوْلاراق ايره لي سوردوكلري، قانوني طلبلري تئزليكله قبول ائديلسين. سيستان زحمتكئشلري  مطبوعاتا  گؤندردي يي  هيجانلي  تئلگرامدا : - بودور، بيزيم غمگين و سوْلغونلاشميش بدنلريميز شمالدان اسن آزادليق نسيميندن حركته گلميشدير؛- دئمكله آذربايجان خالقي نين ملي آزادليق حركاتيني صميميتله آلقيشلاميش و مرتجعلرين اسارت و ظولموندن آزاد اوْلماق اوچون بو ايشي ان دوزگون واسطه كيمي قيمتلنديرميش لر"{42}.

" 21 آذر حركاتي اؤزوندن اوّل كي حركاتلارين بير نوع يئكوني  و مقصدلري نين عملده اجراچيسي اوْلدی . او زامان حركت وئريجي محركلرين 50 فايزي تكجه تهراندا اوْلدوغی حالدا، بوتون آذربايجاندا فقط بير فايزي يئرله شيردي. حال بو كي، بوتون ايران اهاليسي نين اوچده بيريندن چوْخی آذربايجاندا ايدي. ايراندا او زامان مؤوجود اوْلان 69 توْخوجی كارخاناسي نين فقط اوچی ، 30 تريكوتاژ كارخانادان ايكيسي ، 8  قند كارخاناسيندان بيري آذربايجاندا ايدي. البته ، بو كيمي مثاللارين ساييني ايسته نيلن قدر آرتيرماق اوْلار. بئله كي ، 8 كوْنسرو كارخاناسي، 9 بيتگي ياغي توليد ائدن كارخانا ، 20 پامبيق تميزلمه و باشقا كارخانالارين آذربايجاندا نمونه اوچون بيري ده يوْخ ايدي. بير سيرا محصول توليد ائدن ساحه لرين هئچ  بير سبب اوْلمادان فعاليتلري دايانديريليردي.120- دن چوْخ بؤيوك و كيچيك يونگول صنايع موسسه لرينين باغلانماسي نتيجه سينده آذربايجاندا 20 مينه قدر كارگر ايشسيز لر سيراسينا قوْشولموشدی. آذربايجانا اؤزونون دوشمني كيمي باخان ايران حاكمه هيئتي اؤلكه نين انكشافينا هر جهتدن مانعچيليك تؤره ديردي. آذربايجاندا ماشينلي توليد ساحه سي يوْخ درجه سينده ايدي. آذربايجان،اوشاق اؤلومونه گؤره ان ايره لي ده  گئدن اؤلكه لردن ايدي. ائله بئله بير ائل مثالي دا بورادان ميدانا گلميشدي كي، دئييرديلر:- كندلي يازدا جانينا آند ايچدي يي اوشاغينين  پاييزدا  قبرينه آند ايچير.

سيد جعفر پيشه وري نين سؤزی ايله دئسك، پهلوي اؤزونون جاهلانه سياستي نتيجه سينده مملكته بؤيوك ضرر ووردوغی حالدا آذربايجاني تمامي ايله آياقدان ساليب، خالقين ياشايش واسطه لريني تمامي ايله محو ائديب اوْرتادان قالديردي.

ملي حكومت بئله بير غيرعادي شرايطده اقتصادي و سياسي گئري لييه خاتمه وئرمكله قيسا مدت عرضينده آذربايجاندا بوتون ايران اوچون نمونه اوْلا بيلن اقتصادي، اجتماعي و مدني ترقييه نائل اوْلماق مقصدي ايله بير سيرا  تدبيرلرين حياتا كئچيريلمه سيني مهم وظيفه كيمي قارشيا قوْيدی و گئنيش خالق كوتله سينين اكثر طبقه لريني همين تدبيرلرين اجراسينا جلب ائتدي"{43}.

حركاتين رهبري سيدجعفر پيشه وری هله ملي حكومتدن اوّل كي دؤورلره اشاره ائده رك دئييردي: آذربايجان خالقينا معارف بودجه سيندن وئريلن پول آدام باشينا تقسيم ائديلرسه اوْني گؤسته رن بير واحد تاپماق اوْلماز. من اوني كبريته تبديل ائتديم. نتيجه بو چيخدي كي، هر بير نفره  بير كبريت چؤپوندن آز پاي دوشور{44}. بو وضعيّتين مقابلينده " ملي حكومت شاهليق رژيمي نين اوْن ايللرله حياتا كئچيره  بيلمه دي يي  ايشلري  بير نئچه آيين ايچه ريسينده  حياتا  كئچيردي.

1325- جي ايلين دي آيي نين 24- دن 28- نه قدر 213 شهر، قصبه، ماحال و بلوكلاردا بلديیه انجمنلري ، بهمنين 20- سي ايله 26- سي آراسيندا 10 ولايت، 51 ماحال، 151 بلوك و كند انجمنلري سئچه رك ايشه باشلاديلار. بوتون بو انجمنلرده 38 مين نفرآدام اشتراك ائديرديلر. 120- دن چوْخ ارتجاع طرفيندن باغلانميش يونگول صنايع مؤسسه لرينين يئني دن ايشه سالينماسينا و بورادا 20 مين نفر ايشسيزين ايشله تأمين اوْلونماسي حياتا  كئچيريلدي{45}.

بو اولایلارین بیرینه فاکت اولاراق استناد ائتمک اولار. م. افخمي حياتا كئچن بواصلاحاتي خاصلاشديراراق اؤزونون یاشادیغی ساراب شهري ايله باغلي بئله يازير: آذربايجاندا ملي حكومت قورولدوقدان سوْنرا سارابدا دا گئنيش قوروجولوق ايشلرينه باشلاندي . خالق حاكميت اوْرقاني اوْلان ساراب ولايت انجمني بو قوروجولوق ايشينده بؤيوك روْل اوْينادي.ساراب شهرينده اوْلان اوْغلان و قيز مكتبلري گئنيشلندي. مكتب ياشينا چاتميش بوتون اوشاقلار همين مكتبلره جلب ائديلدي. بوندان باشقا اهالي نين كؤمه يي ايله ساراب كندلرينين بير چوْخوندا، او جمله دن اووغان، گؤودوش آباد،سرداها، هريس، جلده باخان، آوارس، شيروانجيق،آغميان، كاروان، ميره كي، ساري قايا و باشقا كندلرده مكتب بينالاري تيكيلدي و لازيمي وسايط له تجهيز اوْلوندی. اوشاقلار اؤز آنا ديللرينده اوْخوماغا باشلاديلار.

ساراب ولايتي نين دئمك اوْلاركي ، بوتون كندلرينده ، او جمله دن قالاجيق دا ، صحرا دا، بيجند ده ، هريس ده ، اسپستان دا، مانقوتاي ، عسگرآباد و سايره كند لرده آخشام سواد كورسلاري تشكيل اوْلونموش دی. ساراب دا ، رازليق دا ، آغميان دا ، اششوسان دا، ميهن ده و بير سيرا باشقا بؤيوك كندلرده  كتابخانا و قرائتخانا تشكيل اوْلوندی. آز بير زاماندا بو قرائتخانالار ملي حكومتين آييرديغي بودجه ايله رونقلندي و اهالي نين  وئردي يي  كتابلارلا  زنگينلشدي.

ملي حكومت دؤورونده اهالييه صحيه خدمتي تشكيل ائديلدي . تئز بير زاماندا ساراب شهرينده 25 تختخوابليق خسته خان ا، معالجه خانا و داواخانا ياراديلدي . همين صحيه موسسه لرينده حكيم لر، پرستارلار و تحصيل آلميش مامالار خالقا قوللوق ائديرديلر. بو دؤورده سارابدا و كندلرده اوشاقلار طبي معاينه دن كئچيريلدي و خسته اوْلانلارين معالجه سي باشلاندي. ساراب ولايت انجمني نين تشبثي و اهالي نين فعال اشتراكي  نتيجه سينده  سايين  گه دي يي  ايله  بوْستان آباد كندي آراسينداكي 100 كيلومتردن آرتيق شوسه يوْل تعمير ائديلدي  و گئنيش لنديريلدي. بوندان باشقا ساراب شهري ايله بير چوْخ  كندلر، اوجمله دن اردها، جلده باخان، ميره كي و بير چوْخ  باشقا  كندلر آراسيندا كي، يوْللار تعمير ائديلدي  و بير سيرا  كندلر آراسيندا  يوْللار ساليندي.

ملي حكومت دئم توْرپاقلاري سو ايله و اهاليني الكتريك ايشيغي ايله تأمين ائتمك مقصدي ايله تاجيار چاييني ميره كي كندي نين ياخينليغيندا جلوْولاماق اوچون اوْردا سد و الكتريك ستاسيوْنی تيكمه سينين مقدماتي ايشلرينه باشلادي.

ملي حكومت دؤورونه  قدر سارابدا الكترك ايشيغي يوْخ ايدي . اهالي آنجاق نفت ايله يانان لامپالاردان استفاده ائديردي. شهرين خيابان و كوچه لري تام  قارانليق ايچينده ايدي. حاكميت خالقين الينه كئچندن سوْنرا ساراب ولايتي انجمني بو چتينلي يي آرادان قالديرماق ساحه سينده موافق تدبير گؤردی. سارابدا كيچيك بير الكتريك ستاسيونی ايشه ساليندي.

سارابدا ياراديلان راديو شبكه سي واسطه سي ایله اهالي ملي حكومتين تدبيرلري  باره ده خبرلري ائشيدير و قوروجولوق ايشينده  داها هوسله چاليشيرديلار.

جاوانلارين قوّه سيندن استفاده ائده رك آز بير زاماندا سارابدا آكتورال دسته سي ياراندي. همين آكتورال دسته سي سارابدا و بير سيرا كندلرده نمايشلر وئرير، كنسرتلر تشكيل ائدير و اهالييه مدني خدمت گؤسته ريرديلر. بو تدبيرلر اهالي طرفيندن بؤيوك رغبتله قارشيلاندي و اهالي اؤز حسابينا آكتورال هيئتينه كؤمك ائديردي.

شهرده كتابخانا، قرائتخانا، سينما و تئاتر كلوبلاري تيكيلدي و استفاده يه حاضيرلاندي. بير سؤزله ملي حكومت دؤورونده آذربايجانين باشقا ولايتلري كيمي سارابدادا معارف، صحيه، آبادليق و سايره ايشلرده بؤيوك جانلانما عمله گلدي . و اهالي خالقا آرخالانان بير حكومتين نه كيمي خارقه لر ياراتماغا قادر اوْلدوغونی عملده  گؤردی{46}.

دؤورون ديگر طرفدن تصويريني وئرمكده سندلي بیر يازي بو جهتدن ماراقليدير. تهران حكومتي ايله ملي حكومت آراسيندا  گئدن دانيشيقلار دؤورونه تصادف ائدن بو یازی ، آذربايجانين گؤركملي صنعتكاري ، عاشيق حسين جاوانين خاطره يازيسي دير.او، بو خاطره يازيني بئله باشلايير: قوام السلطنه نين بيرينجي معاوني مظفر فيروز باشدا اوْلماقلا  تهراندان گلن سرهنگلر، سلطانلار ملي حكومتله دانيشيق آپارماق اوچون تبريزده ايديلر. اوْنلارين گليشي مناسبتي ايله تبريزده كي شير و خورشيد سالونوندا كنسرت تشكيل اوْلونموشدی . من ده اؤزعاشيق آنسامبولوملا همين كنسرته دعوت اوْلموشدوم. سيدجعفر پيشه وري ايله مظفر فيروز ياناشي اوْتورموشدی؛ -  من:

     بير كيمسه دن قوْرخوموز يوْخ، هاميميز بير جان كيمي،

     الده سيلاح دايانميشيق بودور، نگهبان كيمي؛

     آنا يوردی قوْرويوروق، ایگید ستارخان كيمي،

     چونكي بيزه تربيه ني او مرد، قهرمان وئريب.

                                                ×××

     ايندي بيزيم اؤلكه ميزده سوْنسوز قدرتيميز وار.

     هر كيم  بيزه  كج باخارسا، اوْنا  نفرتيميز وار.

     شرق ائلينه ايشيق سالان، ملي دولتيميز وار.

     وطن بيزي  بو دولتين يوْلوندا قوبان وئريب.

                                                ×××

     جاوان حسين، ياتما گيلن، گئجه- گوندوز يازگيلن؛

     او قان ايچن جلادلارين مزاريني قازگيلن،

     چينينده  ساز، الده تفنگ، دوشمن باشين ازگيلن.

     وطنيني تعريف ائله، او، شرقه تكان وئريب.

شعريمي اوْخودوم. كنسرت قورتارديقدان سوْنرا سيدجعفر پيشه وري مني يانينا چاغيريب سوروشدی:

- عاشيق حسين، سيز هارالي سينيز؟

بو سئوال گؤزله نيلمز اوْلسادا:

- قاراداغ ماحالي نين اوتي كندينده نم!- دئديكده ، مظفر فيروز تعجبيني گيزله ده  بيلمه دي:

- سيز جنوبي آذربايجانين اوتي كنديندن سينيز؟

- بلي، آقاي مظفر فيروز.

سوْنرا او حيله گرجه سينه  گولومسه يه رك  اليمي سيخيب:

- ياخشي اوْخودوغونوز اوچون منتدارام! دئدي.

ناظیر معاوني نين حيله سيني آلت- اوست ائدن سيدجعفر پيشه وري مظفر فيروزا دئدي:

- سيز نه اوچون آذربايجانا اينانميرسينيز؟- بو توْرپاقدا يوزلرله حسين كيمي اوْغوللار ياشايير. افسوسلار اوْلسون كي، سيز اوْنلارين ديليني لال، قولاقلاريني كار، گؤزلريني كوْر ائتميسينيز.ايندي ايسه اؤزونوزه  اينامينيز اوْلماديغي حالدا اوني عصيانچي، شورويلرين تبليغاتچيسي دئيه  دامغالاييرسينيز{47}.

شرقشناس عالیم اوْرلوْو، سيدجعفر پيشه وري حاقيندا آمریکالی وليام دوقلاسين رأيني فاكت اوْلاراق تقديم ائدير؛ دوْقلاس يازير: پيشه وري ايراندان آيريلماق يوْخ ، آذربايجانين مختاريتي اوغروندا چيخيش ائديردي . او، آذربايجاندا توْپلانان مالياتين ان آزي  ياريسي نين ايالتين احتياجلارينا صرف اوْلونماسيني طلب ائديردي. او، ايسته ييردي كي، ايالت داها آرتيق درجه ده  اؤزونی اداره ائتمك حقوقونا مالك اوْلسون و ملي مجلسده اوّللرده اوْلدوغوندان آرتيق نماينده يه مالك اوْلسون{48}. سوْوئتلر بيرلي يي نين BMT- ده كي نماينده هيئتي نين باشچيسي قروْميكو ايسه اوْراداجا آذربايجان ملي حكومتي ايله باغلي چيخيش ائده رك دئميشدي: گونئي آذربايجانيندا باش وئرن حادثه لري ايران طرفي بورادا سوْوئت قوْشونلاري نين اوْلماسي ايله علاقه لنديرير.آنجاق اوْرادا باشلانميش حادثه لر ايران خالقلاري نين، ايران دولتي داخيلينده ملي مختاريته جان آتماغي نين تظاهري دير{49}.

بو مناسبتلرین فؤوقونده دایانان بیر فاکتی بورادا قید ائتمک یئرینه دوشر.1946- جي ايلين يانوارآيي نين 28- ده، ملي حكومتين باشچيسي سيدجعفرپيشه ورينين BMT باش آسسامبلياسينا مراجعتي اولان همن فاکت بئله تقديم اوْلموشدی:

 مراجعت

  دنيانين ان قديم خالقلاريندان اوْلان آذربايجان خالقي اؤزونون زنگين ملي تاريخينه مالكدير. عصرلرين كئشمه كئشينده، او، اؤز ملي ديليني، عادت- عنعنه لريني قوْرويوب ساخلايا  بيلميشدير.

ايران ظولمكارلاري آذربايجاني اؤز حاكميتلري آلتينا آلاراق، اوْنون ثروتيني آمانسيز جاسينا  تالاديلار. نتيجه ده آذربايجانين چيچكله نن كند و شهرلري داغيلماق حدينه گليب چاتدي.

شوْونيست بؤيوك دولتچيليك سياستي يورودن ايران حكمدارلاري آذربايجانليلارين مؤوجودلوغوني تمامي ايله انكارائتمه يه جهد گؤسته رير، اوْنلارين ديليني اليندن آلماقدان، هر جور تحقير ائديجي عمللردن چكينميرديلر.

بونا باخماياراق آذربايجان خالقي بيرگون ده اوْلسون، اؤز آزادليغي اوغروندا مبارزه سيني دايانديرمادي. آذربايجانليلارين اؤز ملي آزادليق لاري اوغروندا مبارزه سينين ان پارلاق نمونه سي ستارخان،باقرخان، شيخ محمد خياباني و باشقالارينين حركاتلاريدير. بو جسور انسانلار مبارزه نين باشچيلاري، هم ده شهيدلري ايدي.

قانلي فاشيزمين اوزه رينده دئموكراتيك دولتلرين غلبه سي آذربايجان خالقي نين  مبارزه سينه يئني تكان وئردي، يئني شرايط ياراتدي.

تهران حكومتي نين مقاومتينه باخماياراق بو ايلين21 آذرينده (12 دئكابر) آذربايجان خالقي نين عصرلردن بري آپارديغي مبارزه سي غلبه ايله باشا چاتدي.آتلانتيك خاریتاسينا اويغون اوْلاراق ملي مجلسين، آذربايجان ملي حكومتي نين قورولماسي ايله  نتيجه لندي.

آذربايجاندا دئموكراتيك اساسلارا دايانان بير ملي حكومت قورولوب و اؤز فعاليتي باره ده بوتون دنيايا معلومات ياييب.5 ميليونلوق آذربايجان خالقي ملي ديلي نين ، تاريخي نين، مدنيتي نين كؤمه يي ايله اؤزونون معاصر بير خالق اؤلدوغوني درك ائتدي . و بيرده هئچ واخت فارس ظولمونون آلتيندا  اينله مه يه، فارس ديلينين ايراندا كي باشقا خالقلارين ديللري  اوزه رينده  آغاليقلارينا  اجازه  وئرمه يه جكدير. بو خالق  بير نفركيمي اؤز حياتيني ملي آزادليغينا و دولتينه قوربان وئرمه يه حاضردير.

يئني، دئموكراتيك آذربايجان حكومتي قيسا واخت عرضينده اجتماعي، اقتصادي، مدني ساحه لرده جدّي  ده ييشمه لر ائده  بيليب، داخيلي تحلوكه سيزليك تام  بر قرار اوْلوب. يئني ملي حكومتين فعاليتي سايه سينده عصرلرله استثمار اوْلونان خالق عادي انسان شرايطده  ياشاماغا باشلاييب.

بونونلادا او، اؤز ملي دولتيني قوْروماغا، اوني اداره ائتمه يه قادر اوْلدوغوني گؤسته رير. آذربايجان خالقي نين اراده سي ايله آتلانتيك خاریتاسينا، يعني بؤيوك دئموكراتيك دولتلرين وعدلرينه اويغون اوْلاراق قورولان آذربايجان ملي حكومتي آرتيق  دانيلماز  فاكتدير.

BMT باش آسسامبلياسينا مراجعتي ايله، آذربايجان خالقي خواهش ائديركي ، آذربايجان ملي حكومتي نين مؤوجودلوغی فاكتي تانينسين و كناردان مداخله اوْلمادان ، اوْنا اؤز طالعينين اؤزي طرفيندن معيينلشديريلمه سينه  تأمينات  وئريلسين{50}.

ملي حكومتين باش ناظیري سيد جعفر پيشه وري نين BMT- يه  مراجعتينين داخيلي واريانتيني  گؤسته رن  بير خاطره  يازيني بوردا گه تيرمكله مسئله نین داها دا آیدینلاشماسینا شرایط یارانمسی اینانجینی ایره لی سورمک اولار.

ق. جاويد بو خاطره یازینی بئله قلمه آلیر: 1946- جي ايلين مارت آييندا آمريكا كوْنسولخاناسينين ايشچيسي  و ترجمه چي وظيفه سينده ايشله ين آصف منه زنگ  ووروب، آمريكا كوْنسولونون باش وزير پيشه وري ايله گؤروشمه سينه اجازه ايسته دي...

كوْنسولون جاوابيني آقاي پيشه وري يه  يئتيرديكده:

    - بويورسونلار!- دئيه، جاواب وئردي.

بير نئچه دقيقه دن سوْنرا كوْنسول گلدي. پيشه وري كوْنسولي قبول ائتدي. كونسول اؤز مترجمي آصفه باشا دوشمه دي ييم  ديلده  نه ايسه دئدي.

   - مترجم: جناب كوْنسول حضرتلري سئوال ائتمه يه اجازه ايسته يير- دئديكده،آقاي پيشه وري ساكت بير طرزده يئنه ده :

  - بويورسونلار.- دئدي.

  س- آذربایجانین ایران داخیلینده  قالماسینا  نئجه  باخیرسینیز؟

  - 1324- جي ايلين 12 شهريورينده آذربايجان دئموْكرات فرقه سي نين نشر ائتدي يي مراجعتنامه سينده دئييليركي، آذربايجان ايران سرحدلري داخيلينده اوْلماقلا اؤزوني اداره ائتمك مقصدي ايله مختاريت وئريلمه سيني طلب ائدير. سوْنرا 1324- جي ايلين آبان آيي نين 29- دا تشكيل تاپميش آذربايجان خالق كوْنقره سي( موسسلر مجلسي) طرفيندن قبول ائديلن بياننامه ده يازيلميشديرکی، ايران دولتي داخيلينده آذربايجانا  ملي مختاريت وئريلمه لي دير؛ داها سوْنرا آذربايجان ملي دولتي اؤز اعلاميه سينده آچيق بيلديردي كي،آذربايجان ملي دولتي ايرانين مستقيللي ييني و تماميّتيني حفظ ائده جكدير.

آذربايجان ملي حكومتي گؤسته ريلن پرنسيپلري مدافعه ائتمكله اوْنا لايقينجه عمل ائدير. اوْني دا قيد ائتمه لي يم كي، بياننامه لر واختيندا ايران دولتينه ،  ايراندا كي بؤيوك دولتلرين سفارتخانالارينا گؤنده ريلميشدير؛ امينم كي، جناب كؤنسول بوندان  خبرسيز دئييلدير.

كونسول جاوابدان راضي قالديغيني بيلديريب، ايكينجي سئواليني وئردي:

    - ايران دولتي ايله آمريكا دولتلري آراسيندا تجارت سازشي نين اوْلماسي يعقين كي، باش وزير جنابلارينا معلومدور. بو سازش اساسيندا آمريكا ماللاري تهراندا مانعه سيز و آزاد صورتده ساتيلير. ملي حكومت طرفيندن آمريكا ماللاري نين آذربايجاندا ساتيلماسينا مانعه چيليك  تؤره ديلمه سي  دوْغرودورمي؟

   - آذربايجان ملي حكومتي خالقين مادي رفاه حالي نين، ساغلامليق و صحتي نين دورمادان ياخشي لاشماسينا چاليشير. لاكين، طبي معاينه نين نتيجه سينده معلوم اوْلموشدوركي، آمريكا دولتي نين ايرانا و تهراندان آذربايجانا ساتيش اوچون گؤنده ردي يي  تيكيلي كهنه آمريكا پالتارلاري مختلف خسته ليك ميكروْبلارينين ياييلماسينا سبب اوْلموش دور. بونا گؤره ده  بيز آمريكادان گه تيريلن كهنه گئييم ماللاري نين تؤرتدي يي خسته ليكلرين قارشيسيني آلماق مقصدي ايله آمريكانين كهنه ، كثيف پالتارلاري نين يانديريلماسينا گؤستريش وئرميشيك. ملي حكومت بو باره ده آل - وئرچيلره  ده ين ضرري اؤده يه جكدير. بيز آذربايجانين اقتصادي يوكسه ليشينه كؤمك ائده بيلن و خالقين طلب ائتدي يي ماللاري هر بير اؤلكه دن، او جمله دن آمريكادان دا آلماغا حاضريق. اگر آمريكا دولتي ماشين آوادانليغي ، كند تصرفات ماشين لاري، صنايع ماللاري و ساير تخنيكي اثاثيه لري بيزه  ساتماق مئيلينده اوْلارسا بيز بوني ممنونيتله قبول ائده ريك{51}.

آذربايجاندا آپاريلان آيري - آيري  اصلاحاتا مثبت مناسبتلرين مقابلينده  بير طرفدن تهران حكومتي نين سيلاحلي قوّه لري نين تؤرتدي يي جنايتلر، ديگر طرفدن خالقين قانينا سوساميش، اؤلكه دن قاچميش قان ایچن ملكه دارلارين سيلاحلانديريلميش دسته لري هله ده آذربايجانا باسقيلار پيلاني چكمكدن گئري اوْتورماميشديلار.

 1325- جي ايلده ذوالفقاري يئني دن باش قالديرميش، زنگاني توتماق فيكرينه دوشموشدی.غلام یحیی دانشيان يازيركي،1946- جي ايل يانوارين سوْنوندا ملي حكومت و فرقه نين تاپشريغي ايله من بير نئچه افسر يوْلداشلا زنگانا گئتديم. مرتضوي ني اؤزومه معاون معين ائتميشديم. زنگاندا فدائي لريميزين بيرينجي هيجومی خاتي كندينه اوْلدی. خاتي كنديني آزاد ائتمك اوغروندا دؤيوشلر زاماني قيشين ان سوْيوق و چتين واختيندا رامتين ين باشچيليق ائتدي يي ميانا فدائي دسته لري دوشمنين 180- 150 كيلومتر آرخاسيني توتموشدی. دوشمن اوزه رينه عمومي هيجوم باشلاندي. فدائي لرين قهرمانجاسينا ووروشماسي نتيجه سينده  دوشمن خاتي كنديندن  قالديريلاراق  قاچاغا ساليندي.

 ذولفقارينين و سرهنگ بايندورون دسته سيندن150 نفر اسير توتولدی. اسيرلرين ايچه ريسينده 30 نفر ايران سربازي وارايدي. فدائي لردن ايسه 14 نفر اؤلدی، 32 نفر يارالاندي و5 نفرين آياغيني سوْيوق آپاردي.

1946- جي ايل مارتين آخيرلاريندا كره سف طرفدن مشهور ارتجاچي  و قولدور باشچيلاريندان محمدحسن خان، اسلحه دارباشي و يميني آذربايجانا هيجوم ائتديلر. مرند فدائي دسته لري بؤيوك قهرمانليق گؤسته ره رك دوشمني مغلوب ائتديلر.فدائي لرين قهرمانليقلا ووروشما سي نتيجه سينده آذربايجان خالق دوشمنلريندن تميزلندي{52}.

بونونلا دا آذربايجان ملي حكومتي نين اصلاحات پروقرامي نين حياتا كئچيريلمه سي داها جدي و داها گئنيش وسعت آلدي. بو اصلاحاتين معين  قسمي سادالانسادا، اوْنلارين هر تك- تكي حاقيندا اطرافلي معلومات الده ائتمک، خالقين آمال - آرزولاريندان دوْغان تدبيرلرله باغلي فيكيرلر ايره لي سورمك ، شبهه سيزكي ، کؤلگه ده قالان اولایلاری ایشیقلاندیراجاقدیر.

آذربايجان ملي حكومتي نين آز بير زاماندا  حياتا  كئچيردي يي بؤيوك اصلاحاتين تأثيري،تکجه ايراندا دئییل، ياخين و اوْرتا شرق اؤلكه لرينده ده اؤزونون مثبت تأثيريني گؤسترمیشدي. سببسيز دئييلديركي، بين الخالق همكارلار اتفاقلاري فئدراسيونونون ايرانا گلن نماينده هيئتي نين باش كاتبي لوئي سايان او دؤورده آذربايجاندا اوْلموش، تبريزين طياره ميدانيندا قارشيلاناركن نطق سؤيله ميشدي. لوئي سايان اؤز چيخيشيندادئميشدي: من بين الخالق همكارلار اتفاقلاري فئدراسيونونون صميمي تبريكلريني سيزه،اؤز دلاورانه عصياني ايله اسارت زنجير لريني قيرانلارا چاتديريرام.

من سيزين دئموكراتيك حركاتي سالاملاييرام. سيزين ياراتديغينيز دئموكراتيا ايران ملّتي اوچون بؤيوك سرمشقدير. من اميد ائديره م كي، آذربايجان دئموكراتياسي بوتون ايرانا ياييلسين{53}.

 

بين الخالق همكارلار اتفاقلاري فئدراسيونون باش كاتبي لوئي سايانين استنادگاهي دا، ملّتيميزين درين دوشونجه لي رهبر خاديمي، ملي اؤندر سيدجعفر پيشه وري نين گونده مه  گه تيردي يي دولتچيلي ييميزين برپا سيندا معنا تاپميشدي. بو دوشونجه ايسه چوْخ عصرلي تاريخيميزه  بو جمله لرله حك اوْلموشدی: آذربايجان ملي حكومتي بير حقيقت دير. اوْنون دئموْكراتيك اساسلار اوزره قورولموش حكومت تشكيلاتي و ملي مجلسي اؤزونون لياقت و استعداديني دنيايا بيلديردي. اوْنی داها گئري قايتارماق اوْلماز!

ادبیات و منبع لر:
1- " رزم" روزنامه سي 1324- جي ايل، 24- آذر.
   * محمدلوی عباسی- آذربایجان آزاد اولدی.
2- " دئموکرات" درگیسی 1324- جی ایل. نمره - 2.
3- " آذربايجان" روزنامه سي 1324- جي ایل.
4- سئچیلمیش اثرلر. ص- 216.
5- " آذربايجان" روزنامه سي 1324- جي ایل.
    ملی حکومت و اونون تعقیب ائتدی یی اساس مسئله لر.
   * سيد جعفر پيشه وري.
6- " وطن يولوندا"  قزئتي 1945- جي ايل. 28- دئكابر.
7- ملی حکومت  و رای لر. چاپ - 2001- جی ایل. ونکووئر.
   ملي دولتین قانونلاری نین دئموکراتیک کاراکتری.
   * ميرزه زاده  سلطان.
8- سئچیلمیش اثرلر. ص- 264.
9- " آذربايجان" روزنامه سي 1324- جي ایل.
  * سيد جعفر پيشه وری- بیرینجی کندلی کونفرانسیندا.

10- " آذربايجان" روزنامه سي 1325- جي ایل.نمره- 120.

11- " آذربايجان" روزنامه سي 1349- جي ایل.نمره- 1825.

   * ا. صابر- شهیدلرین حیات سالنامه سی.
12- قیزیل صحیفه لر. ص- 30.
13- باخ ملی مجلس ده 44- ده.
14- باخ ملی کونقره ده 20- یه.
15- باخ  یارانما سببلرین ده  12- یه.
16- "21 آذر" درگیسی 1999- جی ایل. نمره - 2. ص- 11.
17- " آذربايجان" روزنامه سي 1342- جي ایل. نمره- 1480.
   * محسن میلانیان- اورمی شهری نین آزاد ائدیلمه سی.
18- " آذربايجان" روزنامه سي 1334- جي ایل. نمره- 793.
19- باخ ملی کونقره ده 25- شه.
20- باخ  یارانما سببلرین ده 5- شه.
21- " آذربایجان" درگیسی 1367- جی ایل.نمره -7. ص-1.
    * ل. فلکی- 21 آذر نهضتی اونودولمایاجاقدیر.
22- " آذربایجان" درگیسی 1364- جی ایل.نمره- 2. ص-3.
        21 آذر نهضتی تاریخی شرایطدن دوغموشدی.
         * جلال زاهدی.
23- "21 آذر" درگیسی 2000- جی ایل. نمره - 8. ص- 47.
24- باخ  یارانما سببلرین ده 12- یه.
25- باخ ملی کونقره ده 20- یه.
26- " آذربايجان" روزنامه سي 1334- جي ایل. نمره- 109.
27- "21 آذر" درگیسی 2001- جی ایل. نمره- 11. ص- 20.
       آذربايجان ملی حکومتینده  ناظیرلر شوراسی.
         * میرزه زاده  سلطان.
28- " آذربايجان" روزنامه سي 1324- جي ایل. 22- آذر.
29- " آذربايجان" روزنامه سي 1324- جي ایل. نمره- 109.

30- "21 آذر" درگیسی 2001- جی ایل. نمره- 10. ص- 8 .
       آذربايجان ملی حکومتی نین دولت قورولوشی.
       * سهراب زمانی.
31- باخ  گیریش ده  5- شه.
32- 21 آذر. چاپ یئری- 2005- جی ایل. ونکووئر. ص-1.
33- " آذربايجان" روزنامه سي 1334- جي ایل.نمره- 802.
    * ع. هدایت نژاد- بیز فدائی اولماق ایسته ییریک.
34- " آذربايجان" روزنامه سی 1342- جي ایل . نمره- 1467.
35- " رهبر" روزنامه سي 1325- جي ایل.نمره- 690.
36- باخ گیریش ده 3- چه.
37- " آذربايجان" روزنامه سي 1328- جي ایل. نمره- 185.
     * صادق بادگان- 12 شهریور ییغینجاغیندا.
38- " آذربايجان" روزنامه سي 1344- جي ایل.نمره- 1593.
     21 آذر حرکاتی نین 20- جی ایل دونومی.
     * غلام یحیی دانشیان ( معروضه ).
39- " آذربايجان" روزنامه سي 1333- جي ایل. نمره- 632.
40- " آذربايجان" روزنامه سي 1344- جي ایل. نمره-1592.
41- باخ  یارانما سببلرین ده 7- یه.
42- " آذربايجان" روزنامه سي 1341- جي ایل. نمره- 1430.
      دئموکراتیک حرکاتیمیز ایران خالقلاری طرفیندن آلقیشلانمیشدی.
     * محمد رضا عافیت. 43- باخ گیریش ده 24- ده.<
44- باخ 12- یه.
45- " آذربایجان" درگیسی 1364- جی ایل. نمره- 2. ص- 9.
     * لطفعلی اردبیلی- 21 آذر نهضتی و فدائی لر.
46-" آذربايجان" روزنامه سي 1344- جي ایل.نمره- 1593.
47- "21 آذر" درگیسی 1999- جی ایل. نمره - 2. ص- 27.<
48- باخ  یارانما سببلرین ده 54- ده.
49- " وطن یولوندا"  قزئتی 1324- جی ایل. نمره- 12.
50- "21 آذر" درگیسی 2001- جی ایل. نمره- 10. ص- 15.
51- " آذربايجان" روزنامه سي 1337- جي ایل. نمره- 1076.
52- باخ  یارانما سببلرین ده 12- یه.
53- " رزم " روزنامه سي 1325- جي ایل.نمره- 775.

سید جعفر پیشه وری نین اؤلومو ، آذربایجان میللی حؤکومتی ، دموکرات فیرقه سی حاقیندا
سندلی فیلم. دانیشیر: جمیل حسنلی، اکرم رحیملی، حمید هریسچی