۳۴ - بو گئجه
خۏش گؤرۆرَم عزیزلریم
آلتمېش یاشېمدير بوگئجه
سیز اۆچۆن بیر یازې یازدېم
ائشیدک سازلا بو گئجه
بو گئجه،
اۆره‌ک دردیم عزیزلریم
وطنیمه وار بو گئجه
عائیله‌مله سوْیداشلارېم
منه همدم سیز بو گئجه
کؤنلۆمده خوْش آرزېلاریم
خالقېم اۆچۆن وار بو گئجه
آی اولدوزوم اېشېق ساچسېن
شنلیک سیزه یار بو گئجه
آرازېمېن ساغی سوْلو
منه مئهمان دېر بو گئجه
ایکی یئره بؤلۆنسکده
بیرلشدیردیم من بوگئجه
آراز، دردیم سندن درین
آخما بئله، دور بو گئجه
آیرېلېغین کؤکۆن قوروت
بیرلیگی سن قور بو گئجه
ایللردیر کی حسرت باخېر
خالقېم بو تایدان اوْتایا
پارچالانمېش خالقېم گرک
بیرگه لشسین چۆن بو گئجه
من «ائلدار»ام، وطن اۆچۆن
آرزېلارېم خوْش بو گئجه
سرحدلری سېندېرېرام
بیرلشسین ائلیم بو گئجه.
۱۳ قۏرا پیشیرن آیې (تیر) ۱۳۹۸