۱۹ - سربست اؤلکه بسله‌یر وطن سئور اینسانلار
سربست اؤلکه بسله‌یر وطن سئور اینسانلار
ایشغال اولونان یوردون اولکسی باشسیز قالار
مالین، ثروتین ساتیپ میللتی ایشسیز قالار
کیملیگینی سیلدیریب ایگیدی دیلسیز قالار
یاد دیلینده اوخویوب یازار اونون سوزونو
هووئییه تین ایتیریب چالار یادین سازینی.
ایشغالچېلار اؤزۆنۆ زنگین، اۆستۆن توتارلار
باشقا خالقې"زیر- زیبیل"[۱]همده آلچاق سایارلار
خالقې میللی بیلینجدن[۲] گئریده ساخلایارلار
وطن سئوَر کیشییه یاد آدېنې قۏیارلار
بیلینج‌سیز اینسانلارې راحات ساتېن آلارلار
مانقورت[۳]اۏلموش بیر اینسان ایتیرَر منلیڲینی
کؤله کیمی یاشایېب دۆشۆنر سنلیڲینی
تاریخینی اونودوب سیلیب آتار دیلینی
ایشغالچې دانار اۏنون، کیملیڲینی کؤکۆندن
هۏوییَتینی پۏزار یاشادېغې یئریندن
سربست اؤلکه بسله‌یر وطن سئوَر اینسانلار
خالقلا-وطن اوغروندا مالېن-جانېن قۏیانلار
کئچمیشینه سۏیونا صاحاب دئیه چېخانلار
خالقېن دیلین کۆلتۆرۆن ساوونارلار گؤزۆ تک
وارلېغېنې قۏرویوب ساخلايارلار سازې تک
وطن بَسلر خالقېنا گلیشمیش گنج اوْزانلار
اؤلکه‌میزه لازېم دېر جسور، ایگید جوانلار
یوردو یاددان قۏرویان شوجاعتلی اینسانلار
اویغارلېغېن گلیشدیرَن باجاریقلی اوستادلار
تۏپلومونو گلیشدیرَن جسارتلی اۉزمانلار
اولوسوموز فیکیرلر اۆست-اۆستۆنه قۏیسالار
یوردوموزون دردینی گۆندم پلان سایسالار
أل بیر اۏلوب بیرلَشیب بیر اۆرَکده اۏلسالار
آزربایجان اؤزگۆرلۆک هاواسېن یاراداجاق
وطنیمی سۆمۆرگه، ایشغالدان قورتاراجاق
من "ائلدار"ام، یوردومون وطن سئور اوغلویام،
توتساقلېقدا[۴]دۏغولوب ائل-اۏبا وورغونویام
اۏدلار یوردو آزربایجان تۆرک ائلیمه باغلې‌یام
اؤزگۆرلۆک جارچې‌سې‌یام حۆر یاشاما سَسله‌رم
قورتولوش ساز سیمینی، اولوسوما بسله‌رم
۲۰ دۏندوران آیې (بهمن) ۱۳۹۳
[۱] پرئزیدئنت احمدی نژاد-ين دئییشی
[۲]شوعورو، شعور عرب سوزودور
[۳]مانقورت؛ گئرچکده ن بیر آدلیق صیفتی کیمی، اوز سوی کوک و اصیل کیملیکلرینده ن اوزگه لشن و میللی شعورو اولمایان کیمسه لره دئییلیر. مانقورت، اوز آتا، بابا و دوغما میللی کیملییندن اوزگه لشره ک اوز میللی مدنیتی و دیلی ایله بیرلیک دویغوسو ایلیشیغینی قورا بیلمییه ن کیمسه دیر. او چوخ راحاتلیکلا اوز آنا دیلی و اونا باغلی اولدوغو گئرچک مدنی وارلغینی آلچاقلایاراق بوتون بونلارا کوچومسه ییجی گوزو ایله باخار. مانقورت، ایچینده اریمیش یابانجی مدنییته چوخ یوکسک ده یر و حورمت حیسسی ایله یاشایار. او بو ایشده، اونا آغالیق ائتدییی کیمسه نین بویروغی ایله بیر بالاجا اوتانمادان و آنا بالالیق دویغوسوندان تاثیر آلمادان، اوز آناسینین اوره یینی بئله اوخو ایله وورماق آماجینا آلماق قده ر ایرلییه گئتمه یه حاضیر اولار. اونا گوره ده مانقورت؛ داها چوخ اوز آتا-بابا و دوغما میللی مدنی کیملیک و وارلیغینی داغیدیب آرادان آپارماقلا مشغول اولان آنجاق باشقا ائله جده اوز دوشمنی-نین اولسون بئله مدنیتینه باش اییب اونلاری عیبادت ائله مک قدر بویودوب حورمت ائلییه ن گئرچک بیر اصلی و کوکو اولمایان کیمسه دیر.
[۴]اسارتده، (اسیر، اسارت عرب سوزودور)