۱۷- بۆتۆن آنالارا سایغې ایله حؤرمَت
بۆتۆن آنالارا سایغې ایله حؤرمَت
بو گۆن آنامېن دۆنیاسېنې دڲیشمه‌سی موناسیبتی ایله غوربتده
اۆره‌ڲیمی بۏشالتماغا، قلمیمدن باشقا بیر چاره بولمادېم.
۵ آبان ۱۳۹۳
آنا! کؤورهلیرم من ، ایندی دویدوم خبری !
ترک ائله‌ییب گئدیبسن، بو دۆنیانې شهری
گؤرمه‌یه‌جَک اؤولادېن، آرتېق آنا گؤزلری
علاقه‌نی اؤولاددان، همیشه‌لیک کسیبسَن
۸۳ - ایل بیزلرین، باشې اۆسته أسیبسَن
گئجه‌لر سن یاتمایېب، بیزه لای-لای دئییبسَن
سَسیمیزه سس وئریب، بیزه سن های وئریبسَن
بیزیم آغرېلار ایله، ایللر آغرې چکیبسَن
گئجه‌لری یوخوسوز، آنام صاباح ائدیبسَن
ایندی بیزی تک قۏیوب، آنام، هارا گئدیبسَن؟
آنا اینسان باشېنېن، یاراشېقلې تاجې دېر
اؤولاد اؤلَنه قَدَر، آنانېن مؤحتاجې دېر
آناسېز حیات ، آنام، دۏغوردان چۏخ آجېدېر
آنا دئدیڲین تۏپلوم، هم ده اینسان یارادېر
آنا دئدیڲین وارلېق، اینسانلارې ياشادېر
خالقا بۏرجونو وئرمیش، سئویملی آنامېزسان
ایگیدلرین آناسې، سن أرلر آناسې‌سان
اۆرکلرده آلېشان، آلاولار مکانې‌سان
وطنینه سن ایڲیت، بار وئرمیش آغاجې‌سان
اؤولاد دۏغوب بؤیۆتمۆش، تۏپلومون اۏجاغې‌سان
اؤولاد دۏغدون یاشاددېن، بیرعؤمۆر چتین‌لیک‌له
بؤیۆتدۆن اوزاق قالدېن، یاشادېن سن حسرت‌له
سن هئچ یاشام گؤرمه‌دین، اۆزۆلدۆن بئله‌لیک‌له
اۆرکده‌کی سئوگینی، وئردین سن اؤولادېنا
بیزلر ده وئرمه‌لیییک، وطن ایله بودونا
حاکیمییت آیېردې، خالقېنې اؤلکه‌سیندن
غوربته سۆرگۆن ائتدی، اؤز آنا وطنیندن
عایله آیرې دۆشدۆ، بیری-اۏ بیرلریندن
آنالار گؤز یاشېنې، تؤکدۆلر آیرېلېقدان
غم-کدرلر بئزدیردی، چؤکدۆلر آجېلېقدان
محمدین[۱] وئردین سن، ألدن، أللی سگگیزده[۲]
نیسگیلی'له یاشادېن، سۏن قالمېش عؤمۆرۆنده
مزارېنې گؤرمه‌دین، اۏنون، قالدې گؤزۆنده
دئدین: گؤرۆم قبرینی، نفس قالسېن ایچیمده
اؤلمه‌ییب یاشایېر اۏ، هله خالقېن ایچینده
غوربت یئرده گئدیرلر، اینسانلار بوڲۆن گؤڲه!
وطنه گلنمیر'لر، بیرجه آنا گؤرمه‌ڲه !
دؤزَرمی آنا غمه، بئله حسرت غۆصصه‌یه؟
آنا کیمی ایسته‌دین، سن ده اوشاق گؤره‌سَن!
گؤزلرین حسرت چکدی، بیرگۆن ايشېق گؤره‌سَن!
بئله‌جه قاتېلېرام، من ده کَدَرینیزه
سیزین باشېز ساغ اۏلسون، دئییم اؤز ائلیمیزه
آنا اینسان سئوگیسین، بسلر اۆره ڲینیزه
حؤرمت قۏیون یاشامدا، سیز اؤز والیدئینیزه
سئوگی، سایغې گؤرَرسیز، سیزده اؤز نسلینیزده.
بۆتۆن آنالارا سایغې ایله حؤرمَت
۵ قېرۏو آیې (آبان) ۱۳۹۳
[۱] شاعیر بالتاجی آراز(محمد محمد علی اوُغلی)
[۲] شاعیر اللی سگگیز یاشيندا اوره ک اینفاکتی گئچیره رک دونیاسين دییشدی.