۱۰ - آنا دیلی ندیر؟
آنا دیلی ندیر؟
[ یؤنَتکی‌سل(سیاسی)، دۆشونده‌مه،دۆشۆن‌بیلیم(فلسفی) هابئله
تۆزه‌سل(حۆقوقی) آنلامې]
اوشاق ائشیدَر ایلک آنا دیلینده
سۏنرا اؤرگه‌نَر اۏ دؤیوش ائلینده
باشلار دانېشار اؤز دیلی تئلینده
دیلیمیز یارانېب گؤزَل سس‌لردن
زامان'لا گلیشیب اؤزَل حیس‌لردن
دیل اوشاغېن آنا لای لای سَسی‌دیر
آنانېن بطنینده دویوش حیسسی‌دیر
حیس‌لردن یارانان دۆشۆنجه‌سی‌دیر
کیمسه‌دن دۆشۆنجه‌نی آلماق اۏلماز
باشقا بیر دۆشۆنجه‌یه سالماق اۏلماز
اوشاق اؤز ایچینده فیکیر بَسله‌یر
بَسله‌نن فیکرینی دیلده سَسله‌یر
سسلر اولوشوب بیر دیلی أکله‌یر
یارانان دیل دۆشۆنۆلمۆش فیکردیر
دۆشۆنجه'یله فیکیرین دویوش شکلی‌دیر
قلم‌سیز سَس حئیوانلاردان بکله‌نَر
چۆنکی یالنېز اۏرمانلاردا سَسله‌نَر
یاشام دؤزئیی تۏپلوقدا أکله‌نَر
آدام لار تۏپلانېب بیرلیک قوروبدور
«بیرلیک دیریلیک‌دیر» مَثَل اۏلوبدور
هر آدامېن دۏغما آنا دیلی وار
اؤز دیلینده دانېشماغا مئیلی وار
یازېب یاراتماغا اؤزل ائلی وار
دیلی یاساقلاماق هئچ مۆمکۆن دَڲیل
دیله یاساق قۏیان شخص اینسان دَڲیل
بو دؤنیه‌ده یاشایان هر اؤلکه‌ده
قورولموش دیللری اؤزَل اؤلچۆده
دانېشېر ائو-ائشیگینده مکتبده
هرکسین خۏشدور اؤز دیلی اؤزۆنه
بسله‌دیگی آنا دیلی سؤزۆنه
دیل آدامېن کاراکتئرین دَڲیشَر
یازې ایله دانېشېق‌دا گلیشَر
دیل گلیشسه تۏپلومودا گلیشَر
یازېلمایان دیل ایندیکی زاماندا
ایتیب گئدر خالق بیر- ایکی قوشاقدا
آنا دیلی آدامېن کیملیڲی‌دیر
کیملیک هر اینسانېن اؤز منلیڲی‌دیر
منلیک هر اولوسون اؤزل‌لیڲی‌دیر
بیر خالقېن دیلینی اۏندان آلېرسان
تۏپلومدان اۏنلارېن کؤکۆن قازېرسان
آنا دیلی أن بؤیۆک بیر ثروت‌دیر
هۏوییت‌ین تانېتدېران عیززت‌دیر
بابالاردان بیزه قالمېش شؤوکت‌دیر
دیلین قۏرونماسې میللی شرف‌دیر
میللته- وطنه میللی گؤرَو دیر.
۳۱ دۏندوران آیې (بهمن) ۱۳۹۲
تورک دیلی گونئی آزربایجان تورک یوردوندا؛ فارس دیلی و ایران دوولتینین سالدیری و باسقیسی آلتیندا ایکن؛ دیلیمیز تورکجه قارداش تورکییه ده اینگیلیس دیلی و بیرده چئشیدلی یابانجی دیللرین سالدیریسی آلتیندادیر. قوزئی آزربایجاندا ایسه تورک دیلینین گله جه یینی روس دیلی، اینگیلیس دیلی و چئشیدلی یابانجی دیللر اوزه للیکله ده روس دیلی قارانلیق و باسقی آلتینا آلماقدادیر. تورک دیلی یابانجی دیللرین باسقی، سالدیری و دوستاغیندان اوزگور( آزاد ) اولمایینجا قورونوب گوجلنه بیلمز. گلیشه بیلمز.
دیلینه صاحیب چیخابیلمییه ن اولوس( میللت ) ییخیلماغا مکومدور.
گونئی آزربایجان تورک یوردوندا تورک دیلینی اولوم و یوخ اولوب آردان گئتمه یه محکوم ائدن نسنه لر:
✅ تورک دیلینین مکتب و بیلیم یوردلاریندا( اونیوئرسیته لرده ) تدریس اولونماغینین قاداغان اولونماسی.
✅ ایلک مکتب، اورتا مکتب و اونیوئرسیته لرده تحصیل دیلینین تورکجه اولماماسی.
✅ تورک دیلینین رسمی دوولت دیلی اولماماسی.
✅ گونئی آزربایجان تورک یوردوندا، تورکجه نین؛ تورک دیلینین اورتاق و رسمی لاتین الیفباسیندا( قوزئی آزربایجان و تورکییه ده کی تورکجه لاتین الیفباسیندا ) یازیلماماسی.
✅ گونئی آزربایجان تورک یوردوندا؛ ایران فارس دوولتی طرفیندن قاطی و باسقیجی فارسلاشدیرماق سیاستینین یورودولمه سی.