۱۲ - آزربایجان وطنیمدیر، قۏیمویاق باتسېن سسی
آزربایجان وطنیم دیر، قۏیمویاق باتسېن سسی
چۏخ سایلې خالق یاشایېر، بو ایران اؤلکه‌سینده
هر شئی «پارس»'لا تانېنېر، بو ویران اؤلکه‌سینده
میللی فوتبال یېغماسی،«پارسلارېن شاهزاده‌سی»
میللی تیم دن قۏوزانمېر باشقا اولوسلار سَ سی
غئیری فارس دان گۆج آلېر دیرچلدیر فارس آدېنی
منیمسه‌ییر اوغورو، اؤزۆ دادېر دادېنی
فابریکالار، کۆچه‌لر، آلېرلار، فارس آدېنی
چۏخ اولوسلواؤلکه ده باتېب هامېنېن سَسی
ایران، عیراق ساواشې، تۆرکلر ظفر چالدېلار
ألدن گئدن تۏرپاغې تۆرک قانی'لا آلدېلار
ساواش بیتدی یئنه ده «آذری» لیک سالدېلار
ظفرلر اۏلور فارسېن، باتېر تورکلرین سَسی
تۆرک اوغور قازاناندا، دئییر تۆرکۆن وار غئیرتی
آمما حاققېن ایسته‌سه، فارس گؤسته‌ریر نیفرتی
فارس خرجله‌ییر بودجه‌نی، تۆرکه قالېر ذیللتی
بو یورددا بۆتون باتېب غئیری فارسلارېن سَسی
غئیری فارسا دئییرلَر، آلارام قاداسېنې
اؤرڲه‌نیرسه دیلینی، آغلادارام آناسېنې
یاشادارام کؤله تک، بونلارېن هامېسېنې
بونونلا کسیلیر اونلارېن خوش نفسی
عربین نئفتین ساتېر، قازانېر پول شؤهرَتینی
دیلینی یاساقلایېب، خالقې چکیر ذیللَتینی
بئله‌جه وطنداشا، چکدیریر'لر نیکبَتینی
عربی فارسلاشدېرېر دارالېر دار قفسی
غئیری فارسلار جانلا-مالېن، وئرنده وطنینه
فارسلار دئییر، گؤرَوین دیر، دۏداق بۆزۆر ائلینه
میللی حاققېن ایسته‌ینده، تۆپۆرۆر صیفَتینه
«ایران» آدلې اؤلکه‌نین یایېلېر هرگۆن سسی
وطنده یئتیشدیریب، نماینده ساتقېنې
تمثیل ائدیر فارس لارې، ساتېر تۆرکۆن حاققېنې
مجلیسده-ده اوتانېرلار، چکلَر تۆرک آدېنې
«ایران» آدلې اؤلکه‌دن پۆفله‌نیر فارسېن سسی
خالقېمېزدا میللی بیلینج، یارادماسې لازېم‌دېر
میللی بیلینج مانیفئستین تانېتماسې لازېم‌دېر
وطنیمی توتساقلېقدان، قورتارماسې لازېم‌دېر
آزربایجان وطنیمدیر، قۏیمایاق باتسېن سسی.
۲۶ گۆلن آیې (ارديبئهشت) ۱۳۹۳
[۱] "ایران" آدلانان اوُلکه‌ده مملکتین میللی فوتبول تاکیمی کی: باشقا غئیر فارس خالقلاریندان دا اولوشماقدادیر آوتوبوس اوزه رینده یازیلان "پارسلار شاهزاده- سی" و توکیو اولمپیک یاریشمالاریندا میللی ایدمان اویونچولارینی " پارس اولدوزلاری" تانیدانلاری فارس عیرقيچيليغينين راسیستی ماهییتی آچیق آیدین گوروندمکده دیر. حال بوکی اوزبکیستان دوولتی میللی فوتبوُل تاکيمینین آدینی "گوج‌بیرلیکده‌دیر"آدلاندیریر.
پهلوی سولاله‌سیندن بری ایران آدلانان مملکتده فارس شوبییه شیعه‌سینه اساسلانان عیرقچی فارس- ایران مرکزییت دوشونجه سیستیمی کی بو گون اوزلرینی "ایران شهرلی" آدلاندیریرلار گئچن یوز ایله یاخیندیر کی مولتی کولتورئل (چوخ میللتلی یاشایان) "ایران" آدلی مملکتی دونیا سوییه سینده نه تک پارس(فارس) خالقی آدینا تانیتدیریب و تانیتدیرماقدادیرلار بلکه بوتون ساحه لرده او جومله‌دن خبر آگئنتی، فابریکالار،کوچه و خیابان لار، موزه، فوتبول و دیگر ایدمان تاکیم و تشکیلاتلاری پارس و یا فارس آدلاندیرماقلا بو مملکتده یاشایان باشقا غئیر فارس خالقلاری او جومله‌دن مملکتین نیفوسونون 40% تورک میللتینه تحقیر گوزله باخماق مملکتی اوزلرینه یییه چیخماق و بو خالقلارین آدینی، تاریخینی سیلیب بو مملکتده یوخ حساب ائتمکده‌دیرلر.
بـۇ گئدیشلرله آچیق آیدیندیر کی ایرانداکی تـۆرکلرین چـۏغونلوغو ، گئتدیکجه اؤز کیملیکلرینی آلچاق گؤره‌رک اؤز اۆستلریندن تـۆرک آدینی سیلمک قرارینا گله‌لر . نه‌ایسه ، سیزجه بـۇ گئدیشلرین اؤنونده بیز اۏتوروب باخمالی‌ییق می یـۏخسا دۆنیاداکی باشقا اؤز کیملیکلرینی ساوۇنان (مودافعه ائدن) اۇلاسلار کیمی اؤز وارلیقلاریمیزی قـۏروماق ایچین آیاغا قالخیب بـۇ آلچاقلیق لکه‌لرینی اۆستوموزدن سیلمه‌لی‌ییک می ؟ آنجاق گله‌جک ، ایندی‌دن چالیشانلاریندیر و بـۇنو دا بیلمه‌لی‌ییک کی بیزیم ده اؤز کیملیگیمیزه دۇیوملو و دۇیقولو (حساس) اۏلما حاقیمیز وار و اۏلماماسینا اینانساق ، مانقـۇرد ساییلیریق و اۇلوس اۏلاراق دۆنیا اۇلوسلاری آراسیندان آدیمیز سیلینیب یـۏخ اۏلاجاقدیر .
