۱۵ - اۏخول آچېن اولوسوما، اؤز آنا دیلینده
اۏخول آچېن اولوسوما، اؤز آنا دیلینده
خۏردا‌دا [۱]خالق هایقېرېبان، راسیزمه بیلدیردیلر
تۆرکجم یاساق، فارسجا سربست اۏلوب، ویران اؤلکه‌ده
تۆرکون دیلینی تانېدېن، دۆولتین رسمی دیلی
الله آدې حاکیم اۏلان، بوڲۆن «ایران» اؤلکه‌ده
میللتیمیز هارایلادې، دؤولت دویسون بلکه ده
حاقسېزلېق هارایېنې، آنلاتدې میللی اؤلچۆده
هارایلار دویولمادې، عارسېز، کمالسېز دؤولتده
اؤز باشېنا بوراخېلمېش، بوڲۆن«ایران» اؤلکه‌ده
آزاد قۏیون میللتی، آنا دیلین ایسته‌سه
دۏغال حاق دېر خالقېما، آنا دیلینده سَسله‌سه
بالاسېنې اۏخودوب، آنا دیلده بَسله‌سه
عدالتین اۏلمادېغې، بوڲۆن «ایران» اؤلکه‌ده
خالق ایسته‌يير اؤز دیلینده وارلېغېنی اؤینده
زیندان‌لاردا یاتېرلار، گنج'لر سؤزۆن دئینده
آلله ها دۆشمَن سایېر، حاقلارېن ایسته‌ینده!
إعدام سایې حددن آشېب، بوڲۆن ویران اؤلکه‌ده
مدرسه آچېن اولوسوما، اؤز آنا دیلینده
اینسانا تانېنمېش حاق‌دېر، یارانمېش یئرلرینده
تۆرک خالقېنا گۆناه‌دېر، تۆرکۆ اۏخول ایسته‌یَنده؟
اینسان دَڲری اۏلمایان، بوڲۆن ویران اؤلکه‌ده
وئرگیم گئدیر فیلیسطینه، [۳] خالقېم اؤلۆر آجېندان
کیمسه محروم اۏلا بیلمز، اؤز میللی وارلېغېندان
یۏخسا دانېشا بیلمز'لر، بونلار اینسانلېغېندان
ایسلام آدې حاکیم اۏلان، بوڲۆن «ایران» اؤلکه‌ده
الله دان دانېشېارکن حاققېمېزی دانېرلار
دینی قانون یازدېرېب، بیزی کؤله سانېرلار
حاق ایسته‌یَن اینسانلارې، دوستاقلارا سالېرلار!
جللاد تکین حاکیم اۏلان، بوڲۆن «ایران» اؤلکه‌ده
تۆرک دیلینده اۏخوللار، آچمالې‌یېق اؤلکه‌ده
پارلاق گۆنش شافاقېنې،، ساچمالې‌یېق اؤلکه‌ده
آزربایجان بایراغېنې، آسمالې‌یېق اؤلکه‌ده
یوردوموزا ییه دوراق، بوڲۆن ویران اؤلکه‌ده.
۱۹قیزاران آیې (خرداد) ۱۳۹۳
[۱] خرداد ۱۳۸۵ و بیر خرداد قیامی نين میللت لشمک پروسئسی ( س.حاتملو)
[۲] حاق، حوقوق وعدالت دن دانيشانلارا (کی بوگون ایراندا اینسان حاقلارين پوُزوب، اوُزلرینی یئر اوزونده الله هيًن "عدالتین" تمثیلجیله ری گوُستریرلر)
[۳] میلیاردلار دلار ایللیک لیواندا، سوریه ده یمن'له فئلئسطینده ایسلام آدينا پوللار خرج ائیدرلر.
